Misir Qəzza sektoru ilə sərhəddə hasar tikməyə başlayıb
Bakı, 16 fevral, AZƏRTAC
Misir hakimiyyəti Qəzza sektoru ilə sərhəddə - İsrail ordusunun hücum etməyə hazırlaşdığı Rafah şəhəri yaxınlığında səddin inşasına başlayıb.
AZƏRTAC xəbər verir ki, bu barədə peyk vasitəsilə çəkilən fotoşəkilləri təhlil edən “The New York Times” qəzeti yazıb.
Nəşrin məlumatına görə, fevralın 5-də buldozerlər Rafah sərhəd-keçid məntəqəsinin cənubundakı bufer zonada geniş ərazini təmizləməyə başlayıb. Ərazidə işləyən podratçı və mühəndislərin sözlərinə görə, Misir ordusu onlara bufer zonada 5 metr hündürlükdə beton sədd çəkməyi əmr edib.
Bir müddət öncə Fələstinin Xarici İşlər Nazirliyi İsrail ordusunun Qəzza sakinlərinin gediş-gəlişini məhdudlaşdıraraq onları Misirlə sərhəddə yerləşən Rafah keçid məntəqəsinə doğru yönəlməyə məcbur etdiyini bildirib.
Qeyd edək ki, Qahirə fələstinlilərin Sinay yarımadasına köçürülməsi planına dəfələrlə etirazını bildirib və onların öz torpaqlarından zorla çıxarmaq cəhdlərinin qəbuledilməz olduğunu bəyan edib.
Bölmənin digər xəbərləri
