SİYASƏT
Misirdə təhsil alan azərbaycanlı gənclər İlham Əliyevin namizədliyinə səs verəcəklər
Qahirə, 20 iyun (AZƏRTAC). Misirin ali məktəblərində təhsil alan azərbaycanlı gənclər ölkəmizin indiki rəhbərliyinin siyasətini tamamilə dəstəkləyirlər və oktyabrın 16-da keçiriləcək prezident seçkilərində onlar indiki Prezident İlham Əliyevin namizədliyinə səs verəcəklər.
Məşhur “Əl-Əzhar” İslam Universitetinin tələbəsi Əli Güləlizadə AZƏRTAC-ın müxbirinə bildirmişdir ki, azərbaycanlı tələbələrin çoxu ölkəmizin Tələbə Gənclər Təşkilatları İttifaqı Milli Şurasının forumunun təşəbbüsünə qoşularaq, qarşıdakı prezident seçkilərində Azərbaycanın indiki Prezidenti İlham Əliyevin namizədliyini dəstəkləyəcəkdir.
Ə.Güləlizadə demişdir: “Bizim fikrimizcə, Azərbaycan gəncləri artıq düzgün seçim etmişlər. Onların seçimi İlham Əliyevdir. Bu şeçim həm son illərdə Azərbaycanın sürətlə inkişaf edərək, regionun aparıcı ölkələrindən birinə çevrilməsi ilə, həm də son illərdə ölkədə həyata keçirilən gənclər siyasətinin müsbət nəticələri ilə əlaqədardır. Bizim gənclər, tələbələr, xüsusən xaricdə təhsil alan tələbələr dövlətimizin indiki rəhbərinin gənclərin problemlərinə diqqətini, onların təhsili, əmək fəaliyyəti və hərtərəfli inkişafı üçün lazım olan hər cür şərait yaradılmasını həmişə hiss edirlər. Biz seçkilərdə fəal iştirak edəcək və ölkəmizin ölçülüb-biçilmiş praqmatik siyasətinin bundan sonra da davam etdirilməsi üçün ən layiqli namizədə səs verəcəyik. Sevindirici haldır ki, Azərbaycan güclü, sabit və dünyada hörmət qazanmış dövlətdir. Azərbaycanın BMT Təhlükəsizlik Şurasının qeyri-daimi üzvü seçilməsi, onun bir sıra beynəlxalq layihələrdə iştirakı, Azərbaycan süni kosmik peykinin orbitə çıxarılması və bu gün müşahidə etdiyimiz bir sıra başqa sevindirici faktlar buna sübutdur”.
Ə.Güləlizadə xüsusi qeyd etmişdir ki, Azərbaycanda iqtisadi artımın və həyat səviyyəsinin yüksəlməsi gənclər üçün, gələcəkdə onların öz imkanlarını reallaşdırmaları üçün əlverişli şərait yaradır. O demişdir: “Ölkəmizdə gənclərin məşğulluğunun təmin edilməsi, gənclər arasında işsizliyin azaldılması üçün tədbirlər görülür, gənc mütəxəssislər mühüm dövlət vəzifələrinə və ictimai vəzifələrə irəli çəkilir. Bunu demək kifayətdir ki, xarici ölkələrdə təhsil alan gənclərimiz həmin ölkələrdə qalmayıb Vətənə qayıdırlar. Mənim fikrimcə, bu çox əlamətdar haldır. Biz sabahkı günə inanırıq və cəmiyyətdə öz yerimizi tapacağımıza, bilik və qüvvələrimizi öz dövlətimizə, öz ölkəmizə sərf edə biləcəyimizə əminik”.
“Ayn Şəms” universitetindən Tuncay Babayev və “Əl-Əzhar” universitetindən Cavid Allahyarov deyilənlərə onu əlavə edirlər ki, bizim gənclər öz ölkələri ilə fəxr edirlər. Bu gün Azərbaycan mütərəqqi dövlətdir, dünya birliyi ölkələri arasında böyük nüfuz sahibidir. Bütün sahələrdə ölkəmizin uğurları dünyada müsbət qiymətləndirilir və inkişafa yönəlmiş bu siyasət davam etdirilməlidir. Ölkəmizdə bütün müsbət dəyişikliklərin və bu siyasətin davam etdirilməsinin qarantı isə, əlbəttə, İlham Əliyevdir. Bu illər ərzində o, müasir, səmərəli və demokratik dövlət qurmuşdur. Onun sözləri və əməlləri həmişə bir-birinə uyğun olmuşdur.
Asya Hacızadə
AZƏRTAC-ın xüsusi müxbiri
Qahirə