Qahirə, 30 may (AZƏRTAC). Misirdə prezident seçkiləri keçirilmişdir. Səsvermənin hələ rəsmi sayılmayan ilkin yekunlarına görə, Misirin sabiq müdafiə naziri Əbdülfəttah əs-Sisi prezident seçkilərində inamla irəlidədir. Səsvermədə iştirak etmiş seçicilərin 92,9 faizi onu dəstəkləmişdir. İlkin məlumata görə Əbdülfəttah əs-Sisiyə 23.264.306 nəfər, onun opponenti Həmdin Sabbahiyə isə 750.300 nəfər (3 faiz) səs vermişdir. Səsvermə hüququna malik olan 54 milyon misirlidən seçkilərdə iştirak edənlərin sayı 25 milyondan çox olmuşdur.

Prezident vəzifəsinə digər namizəd Həmdin Sabbahi seçkilərdə məğlub olmasını rəsmən etiraf etmiş və xalqın seçiminə hörmətlə yanaşdığını bildirmişdir.

Avropa İttifaqı Misirə 150-yə yaxın müşahidəçi göndərmişdir. Aİ-nin müşahidəçilər missiyası Misirdə seçkilərin azad və qanuni olmasını bildirmiş, seçkilərin təşkilini və keçirilməsini müsbət qiymətləndirmişdir. Onların məruzəsində gələcəkdə seçki prosesinin “daha yaxşı keçməsi” üçün bir sıra tövsiyələr vardır.

Qeyd etmək lazımdır ki, Əbdülfəttah əs-Sisinin tərəfdarları bu gecə səhərə qədər Piramidalar Diyarının əsas küçələrində onun qələbəsini bayram etmişlər. Qahirənin mərkəzindəki Təhrir meydanında bir neçə min nəfər misirli toplaşmışdı. Əllərində milli bayraqlar tutmuş bu adamlar dövlət himnini oxuyur, rəqs edir, fişənglər atır, atəşfəşanlıq təşkil edirdilər.

Seçkilərin rəsmi yekunları iyunun 4-də elan ediləcəkdir.

Misirin yeni lideri feldmarşal əs-Sisi təcrübəli hərbçidir. 2013-cü ilin iyununda ölkədə “Müsəlman qardaşları” təşkilatının nümayəndəsi prezident Məhəmməd Mürsiyə qarşı milyonlarla insanın iştirak etdiyi mitinqlərdən sonra əs-Sisi çox populyarlaşmışdır. O vaxt ali baş komandan general əs-Sisinin rəhbərlik etdiyi ordu Misir xalqını dəstəkləmiş və iyulun 3-də onun komandanlıq etdiyi ordu sabiq dövlət başçısının öz vəzifəsindən, habelə “Müsəlman qardaşları” təşkilatının hakimiyyətdən kənarlaşdırıldığını elan etmişdir.

Asya Hacızadə

AZƏRTAC-ın xüsusi müxbiri

Qahirə