“Missiya:2030” hakatonu başa çatıb
Mingəçevir, 29 iyul, Rəşad Türkoğlu, AZƏRTAC
Gənclər paytaxtı Mingəçevir şəhərində Gənclər və İdman Nazirliyinin “Gənclər Dayanıqlı İnkişaf Məqsədləri üçün” layihəsi çərçivəsində Rəqəmsal İnkişaf və Nəqliyyat Nazirliyi ilə birgə həyata keçirilən və Qarabağın yenidən bərpa və quruculuğuna həsr edilən “Missiya:2030” hakatonunun bağlanış mərasimi baş tutub.
AZƏRTAC xəbər verir ki, hakatonun əsas məqsədi gənclər arasında Dayanıqlı İnkişaf Məqsədlərinin Qarabağda innovativ yolla təbliğini təmin etmək və gəncləri davamlı inkişaf üçün dayanıqlı həll yolları təklif etməyə təşviq etmək olub. Tədbirin bağlanış mərasimində Gənclər və İdman Nazirliyinin şöbə müdiri Ramil Cabbarov, energetika nazirinin müşaviri Vüsal Rəcəbli, Mərkəzi Aran Regional Gənclər və İdman İdarəsinin rəisi Azad Gözəlov, Azərbaycan Respublikasının Kosmik Agentliyinin (Azərkosmos) departament rəhbəri Natavan Həsənova, “Gənclər Dayanıqlı İnkişaf Məqsədləri üçün” layihəsinin rəhbəri Zərifə Zülfüqarova, Dayanıqlı İnkişaf Məqsədi (DİM) üzrə gənc səfir, hakatonun ideya müəllifi Ləman Cəlilova çıxış ediblər.
Hakatonun münsiflər heyətində Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəliyinin rəsmisi olub. Hakatonda 100 gənc 25 komanda şəklində iki gün müddətində Qarabağın davamlı inkişafına həsr edilən 5 mövzu üzrə 25 innovativ və dayanıqlı həll yollarını təklif edib.
Komandalar ideya və təqdimatlarını təkmilləşdirmək üçün mentorların kömək və tövsiyələrindən istifadə ediblər. Mentorlar arasında 7 əlaqədar dövlət orqanının, Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəliyinin, Rəqəmsal İnkişaf və Nəqliyyat Nazirliyinin, İnnovasiya və Rəqəmsal İnkişaf Agentliyinin, “Azərkosmos”un, Coğrafi İnformasiya Sistemləri Mərkəzinin, Aqrar İnnovasiya Mərkəzinin rəsmiləri, DİM üzrə gənc səfirlər, təhsil işçisi, sahibkarlardan ibarət 12 nəfərlik heyət çalışıb.
Qaliblər müvafiq olaraq 5 min, 3 min və 2 min məbləğində pul mükafatı və diplomlarla təltif ediliblər. Qalib komandaların mövzuları Qarabağda ərzaq təhlükəsizliyinin təmini, Qarabağda təhlükəsiz, davamlı və smart şəhərlərin salınması kateqoriyalarına aid olub. Birinci yerin qalibi olan komanda üzvlərinə sentyabr ayında BMT-nin Nyu-York şəhərindəki mənzil-qərargahında keçirilən DİM sammitində iştirak hüququ verilir.
Qeyd edək ki, hakaton iştirakçıları 310 nəfər arasından seçilib.
Xatırladaq ki, tədbirin əsas mövzuları Qarabağda ərzaq təhlükəsizliyinə və daha yaxşı qidalanmaya nail olmaq, dayanıqlı kənd təsərrüfatını təşviq etmək, sərfəli, etibarlı, dayanıqlı və müasir enerji mənbələrinə çıxışı təmin etməkdir. Həmçinin şəhər və yaşayış məntəqələrinin açıqlığını, təhlükəsizliyini, davamlılığını və ekoloji dayanıqlılığını təmin etmək, dayanıqlı istehlak və istehsal modellərinə keçidi təmin etmək və kosmosun Dayanıqlı İnkişaf Məqsədlərinə nail olmaq məsələləri tədbirin əsas mövzuları sırasındadır.
Bölmənin digər xəbərləri
