MİXAİL ŞUMAXERƏ ADA HƏDİYYƏ ETMİŞLƏR
AZƏRTAC xarici KİV-lərə istinadla xəbər verir ki, “Formula-1” üzrə yeddiqat dünya çempionu Mixail Şumaxer idman karyerasını başa çatdırmışdır. Birləşmiş Ərəb Əmirliklərinin vəliəhdi şeyx Məhəmməd bin Rəşid Al Məktumun məşhur idmançıya bu münasibətlə bağışladığı adanın qiyməti 7 milyon dollardır. Bu, Dubay yaxınlığında 9 kilometrlik zonada yerləşən süni adalardan biridir. Təyyarədən bu adalar qrupu xəritəni xatırladır. Şumaxerin adası “Antarktida” rayonunda yerləşir.
Avtoyürüşçünün meneceri Villi Veber demişdir ki, Şumaxer bir neçə ildən sonra adanın abadlaşdırılmasını başa çatdıracaqdır. Bundan sonra Mixail və onun xanımı Korinnanın dincəlmək üçün şəxsi adası olacaqdır. Adaya yalnız kater və ya vertolyotla getmək olar. Şumaxerin burada kartinqlə məşğul olmaq üçün avtodrom tikdirəcəyi də gözlənilir.
Bölmənin digər xəbərləri
