Moskva vilayətində yanğın: ölən var
Moskva, 9 dekabr, AZƏRTAC
Moskva vilayətində yerləşən “OBI” hipermarketində baş vermiş yanğın nəticəsində bir nəfər həlak olub.
AZƏRTAC xəbər verir ki, 18 min kvadratmetr sahəni əhatə edən yanğın hazırda 7 min kvadratmetr sahədə lokallaşdırılıb. Hadisə nəticəsində hipermarketin mühafizəçisi həlak olub.
Yanğın Moskva vilayətinin Ximki şəhərində yerləşən “Meqa” ticarət mərkəzinin tərkibində fəaliyyət göstərən “OBI” hipermarketinin mebel və tikinti materialları şöbəsindən başlayıb. Hadisə güclü partlayışlarla müşayiət olunub. Ehtimal edilir ki, hipermarketdə olan boya və aerozol qutuları partlayıb.
Güc strukturları yanğının iki səbəbini - qısa qapanma və kənardan müdaxilə variantlarını araşdırırlar.
Hazırda yanğın söndürülüb. Alovun ticarət mərkəzinin digər bölmələrinə keçməsinin qarşısı alınıb. “OBI” hipermarketi tamamilə yanıb, binanın yalnız aparıcı konstruksiyaları salamat qalıb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
