MOSKVANIN MİNSKƏ TƏKLİFİ
Rusiya gələcəkdə Belarusla birləşməyin üç əsas variantının movcudluğunu təsdiqləmişdir. Bunlar vahid dövlət kimi tam inteqrasiya, Avropa Birliyi tipli fövqəldövlət qurumu, habelə ittifaq dövləti yaradılması haqqında mövcud müqavilənin müddəaları əsasında birləşmə istiqamətində iş aparılması variantlarıdır. Bu variantlar Rusiya Prezidenti Vladimir Putinin Belarus Prezidenti Aleksandr Lukaşenkoya məktubunda irəli sürülmüşdür.
İTAR-TASS-ın yaydığı xəbərə görə, məktubda Rusiya tərəfinin hansı varianta üstünlük verdiyi barədə heç nə deyilmir. Amma sirr deyil ki, Moskvada ilk iki variantı - vahid dövlət və ya Avropa Birliyi tipli qurum yaradılmasını daha optimal sayırlar. Bunlar sınaqdan çıxmış, hüquqi baxımdan başa düşülən və dövlətlərarası inteqrasiyanın beynəlxalq standartlara daha çox uyğun gələn formalarıdır.
RF Prezidenti məktubunda daha perspektivli inteqrasiya modelini müəyyənləşdirmək üçün onlardan hər birini diqqətlə və hərtərəfli şəkildə araşdırmaq məqsədi ilə birgə qrup yaradılmasını təklif etmişdir. Qrup öz işinin gedişi və nəticələri barədə Rusiya və Belarus prezidentlərini, habelə ictimaiyyəti müntəzəm olaraq məlumatlandırmalıdır ki, bu da rusiyalıların və belarusların əhval-ruhiyyəsini obyektiv şəkildə qiymətləndirməyə, ittifaq dövləti qurmaq üçün seçilmiş model haqqında ümumi razılığa zəmanət almağa imkan verərdi.
Vladimir Putin məktubunda əmin olduğunu bildirmişdir ki, birgə səylər sayəsində inteqrasiya proseslərinə daha güclü və fəal dinamika vermək, Rusiya-Belarus yaxınlaşmasının daha da dərinləşməsində əhəmiyyətli irəliləyişə nail olmaq mümkündür.
Bölmənin digər xəbərləri
