MÜBARƏK GÜN MÜNASİBƏTİLƏ
Həzrəti Məhəmməd Peyğəmbərin (s) mübarək mövlud günü və “Vəhdət” həftəsi ilə əlaqədar “Həyat Recensi-Naxçıvan” mehmanxanasında mərasim keçirilmişdir.
İran İslam Respublikasının Bakıdakı fövqəladə və səlahiyyətli səfiri Əhəd Qəzai çıxış edərək, mübarək gün münasibətilə mərasim iştirakçılarını, bütün müsəlmanları təbrik etdi və müqəddəs dinimiz olan İslamın humanistliyindən, sülhpərvərliyindən danışdı. Bir dinə mənsub olan İran və Azərbaycan xalqlarının mehriban qonşuluq və qardaşlıq münasibətlərindən söhbət açan diplomat ölkələrimiz arasında əlaqələrin daha da inkişaf edəcəyinə əmin olduğunu vurğuladı.
Qafqaz Müsəlmanları İdarəsinin sədri şeyxülislam Hacı Allahşükür Paşazadə ölkəmizdə dini dəyərlərin qorunub saxlanılması və inkişaf etdirilməsi üçün hər cür şərait yaradıldığını və Prezident Heydər Əliyevin bu işə daim böyük diqqət və qayğı göstərdiyini söylədi.
Sonra çıxış edən digər natiqlər Məhəmməd Peyğəmbərin /s/ və İslam dininin böyüklüyündən və müqəddəsliyindən söz açdılar.
Mərasim Azərbaycan və İran incəsənət ustalarının maraqlı konsert proqramı ilə başa çatdı.
Bölmənin digər xəbərləri
