REGİONLAR
Muxtar respublikada qadınlarla bağlı sosial layihələr uğurla icra olunur
Naxçıvan, 21 iyul, AZƏRTAC
Naxçıvan Muxtar Respublikasında ailə, qadın və uşaqların hüquqlarının qorunması istiqamətində qəbul edilmiş Dövlət proqramlarından irəli gələn vəzifələrin icrası daim diqqət mərkəzində saxlanılır.
AZƏRTAC-ın Naxçıvan bürosu xəbər verir ki, Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsində keçirilən iclasda bu sözləri komitə sədri Ramilə Seyidova deyib.
Komitə tərəfindən qadınlarla bağlı icra olunan sosial layihələr barəsində məlumat verən Ramilə Seyidova bildirib ki, hesabat dövrü ərzində İsveçrə İnkişaf və Əməkdaşlıq Agentliyi tərəfindən maliyyələşdirilən Azərbaycan Mikromaliyyə Assosiasiyası və Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən icra olunan “Ailə rifahı naminə qadınları maarifləndirək” layihəsinin açılış konfransı keçirilib. Konfransda İsveçrə Əməkdaşlıq Təşkilatının, beynəlxalq donor təşkilatlarının, Azərbaycan Mikromaliyyə Assosiasiyasının və assosiasiyanın üzv təşkilatlarının nümayəndələri iştirak edib. Layihənin şərtlərinə uyğun olaraq muxtar respublikanın şəhər və rayonlarından olan 50-dən artıq xüsusi qayğıya ehtiyacı olan ailənin üzvü və sağlamlıq imkanları məhdud olan qadınlara sərmayə kapitalı verilməsi nəzərdə tutulub. Verilən sərmayə kapitalının 70 faizindən artıq hissəsi ailə təsərrüfatlarının qurulması üçün, 30 faizə yaxını isə digər fəaliyyət sahələri üzrə müəyyənləşib.
Komitə sədri qeyd edib ki, hesabat dövrü ərzində İsveçrə İnkişaf və Əməkdaşlıq Agentliyi tərəfindən maliyyələşdirilən “Ailə rifahı naminə qadınları maarifləndirək” layihəsi çərçivəsində muxtar respublikanın bütün rayonlarından xüsusi qayğıya ehtiyacı olan 70 qadının iştirakı ilə 3 dəfə “Gələcəyini planlaşdır” və 1 dəfə “Sahibkar ol!” təlimləri keçirilib. Hər bir qadın fəaliyyət istiqamətlərinə görə biznes-planı hazırlayıb. Sonda təlim iştirakçısı olan qadınlara Azərbaycan Mikromaliyyə Assosiasiyası tərəfindən sertifikatlar təqdim olunub.
Diqqətə çatdırılıb ki, 8 Mart - Beynəlxalq Qadınlar Günü münasibətilə bayram tədbiri keçirilib, tədbirdə 56 müəllifin 86 kitabı, 45 istedadlı qadının 792 rəsm və əl işi və ailə təsərrüfatı ilə məşğul olan 10 qadının istehsal etdiyi 150 adda ailə təsərrüfatı məhsullarından ibarət sərgi-satışı təşkil olunub. Şəhid, qazi ailələrinin, hərbçi, müəllim, dövlət qulluqçusu və digər sahələr üzrə fəaliyyət göstərən şəxslərin ailələrinin iştirakı ilə 15 may - Beynəlxalq Ailə Günü ilə bağlı tədbir keçirilib, həmin ailələrə hədiyyələr təqdim edilib. 1 iyun - Uşaqları Beynəlxalq Müdafiə Günü ilə əlaqədar muxtar respublikanın şəhər və rayonlarında silsilə tədbirlər keçirilib, təhsil, incəsənət və idman sahələri üzrə fərqlənən 109 uşaq komitə tərəfindən fəxri fərman və hədiyyələrlə təltif olunub, istedadlı uşaqların əl işlərindən ibarət sərgiyə baxış olub.
Bildirilib ki, hesabat dövrü ərzində Naxçıvan Muxtar Respublikası Ali Məclisi Sədrinin tapşırığına əsasən muxtar respublikanın turistik mərkəzlərində istedadlı qadınların əl işlərindən ibarət səyyar sərgi-satışlarda, əl işləri mağazalarında, keçirilən sərgi-satışlarda, yarmarkalarda, festivallarda qadınların əl işləri sərgilənib və 183 şəxsin 10002 manat dəyərində 1201 müxtəlif adda əl işi, 182 adda ailə təsərrüfatı məhsulları və 50 kiloqram şirniyyat satılaraq dəyəri iş sahiblərinə təqdim olunub. Hesabat dövrü ərzində 20 sağlamlıq imkanları məhdud uşağın evində monitorinq keçirilib, 12 uşaq müəssisəsində, valideynlərini itirmiş və valideyn himayəsindən məhrum olmuş 6 uşağın yaşadığı ünvanda, 191 uşağın təhsil aldığı 46 uşaq müəssisəsində monitorinqlər aparılıb, ekskursiyalar təşkil edilib, 47 uşağın iştirakı ilə Ağbulaq İstirahət Mərkəzində “Yay məktəbi” təşkil olunub.
Məruzə ətrafında komitənin sədr müavini Aytən Məmmədova, şöbə müdiri Vüsalə Vəliyeva çıxış edib, kollegiyanın gündəliyində duran digər məsələlər müzakirə edilib. Sonda kollegiya iclasının qərar layihəsi qəbul edilib.