Naxçıvan, 30 aprel, AZƏRTAC

Azərbaycan Respublikasının Prezidenti İlham Əliyevin 2021-ci il 24 iyun tarixli sərəncamları ilə ölkəmizin ərazi bütövlüyü uğrunda aparılmış döyüş əməliyyatlarında igidlik və şücaət göstərmiş naxçıvanlı hərbi qulluqçular da müxtəlif orden və medallarla təltif ediliblər. Naxçıvan Şəhər İcra Hakimiyyətində həmin medalların, onların vəsiqələrinin şəhid ailələri, qazi və Vətən müharibəsi iştirakçılarına təqdim olunması ilə bağlı növbəti tədbir keçirilib.

Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin mətbuat xidmətindən AZƏRTAC-ın Naxçıvan bürosuna bildirilib ki, əvvəlcə Azərbaycanın ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

Tədbirdə Naxçıvan Şəhər İcra Hakimiyyətinin başçısı Mirsənani Seyidov çıxış edərək ölkəmizdə, o cümlədən Naxçıvan Muxtar Respublikasında ordu quruculuğu istiqamətində həyata keçirilən tədbirlərdən danışıb. Qeyd edib ki, Vətən müharibəsində torpaqlarımızın işğaldan azad edilməsi uğrunda böyük şücaət göstərərək şəhid olmuş Naxçıvan şəhər sakinləri - baş leytenant Sahil Məmmədov “Kəlbəcərin azad olunmasına görə”, baş leytenant İsmayıl Vəliyev “Laçının azad olunmasına görə” və “Suqovuşanın azad olunmasına görə”, gizir Bağır Ələkbərov “Füzulinin azad olunmasına görə”, müddətdən artıq hərbi xidmət keçən hərbi qulluqçular Araz Məmmədov, Xansu Qurbanov, İslam Eyvazov, İbrahim İbrahimov, Seymur İbrahimov “Füzulinin azad olunmasına görə” medalları ilə təltif ediliblər. Qazi, müddətdən artıq hərbi xidmət hərbi qulluqçuları - Nurəddin Nəbiyev, Yusif Haqverdiyev “Füzulinin azad olunmasına görə”, Vətən müharibəsi iştirakçıları - mayor Ruslan Novruzov, mayor Rasim Zamanov, əsgər Şükür Novruzov “Suqovuşanın azad olunmasına görə”, müddətdən artıq hərbi xidmət keçən hərbi qulluqçular Murad Əliyev və Mir İsmayıl Süleymanov isə “Füzulinin azad olunmasına görə” medalına layiq görülüblər.

Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin rəisi, polkovnik-leytenant Anar Aqilov çıxışında qeyd edib ki, Vətən müharibəsində Silahlı Qüvvələrimizin üç minə yaxın hərbi qulluqçusu şəhid olub, min nəfərdən artıq hərbi qulluqçumuz yaralanaraq sağlamlığını itirib. Vətənin müdafiəsi uğrunda canlarından keçmiş şəhidlərimizin 15 nəfəri Naxçıvan şəhər qeydiyyatında olub. Vətən torpaqlarına azadlıq toxumu səpən qeyrətli Vətən oğulları xalqımızın qəlbində hər zaman yaşayacaq.

Sonra medalların təqdimatı olub. Şəhid ailələri, qazilər və Vətən müharibəsi iştirakçıları onlara göstərilən diqqət və qayğıya görə dövlətimizə minnətdarlıqlarını bildiriblər.

X X X

Şərur rayonunda keçirilən təqdimat mərasimində də Vətən müharibəsi şəhidlərinin əziz xatirəsi bir dəqiqəlik sükutla yad edilib.

Rayon icra hakimiyyətinin başçısı Kamal Cəfərov qeyd edib ki, ərazilərimizin düşmən tapdağından azad olunmasında canlarını, qanlarını əsirgəməyən şəhidlər, qazilər və müharibə iştirakçılarına daimi dövlət qayğısı göstərilir. Bu gün şəhid ailələrinə, müharibə əlillərinə və müharibə iştirakçılarına təqdim olunan “Füzulinin azad olunmasına görə”, “Kəlbəcərin azad olunmasına görə”, “Suqovuşanın azad olunmasına görə” və “Şuşanın azad olunmasına görə” medalları da bu qayğının təzahürüdür.

Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Şərur Rayon İdarəsinin rəisi, polkovnik-leytenant Həsən Məmmədov çıxışında bildirib ki, haqq savaşımızda Azərbaycanın bütün bölgələri kimi, Şərur rayonunun oğulları da düşünmədən, gözünü qırpmadan bu savaşa qatılıblar. Onlarla igid həmyerlimiz şəhid, qazi adlarını qazanıblar. Həmin Vətən övladları bu müqəddəs savaşın qəhrəmanlarıdır. Bu qəhrəmanları həmişə dərin hörmətlə yad edilir, xatirələri əziz tutulur.

Şəhid Əli Yusifovun atası Suləddin Yusifov şəhid ailələri adından onlara göstərilən diqqət və qayğıya görə minnətdarlığını bildirib.

Sonda şəhid ailələrinə, qazilərə və Vətən müharibəsi iştirakçılarına medallar təqdim olunub.

X X X

Babək rayonunda igid Vətən oğullarının əziz xatirəsi bir dəqiqəlik sükutla yad edildikdən sonra tədbirdə çıxış edən rayon icra hakimiyyətinin başçısı Rasim Hüseynov bildirib ki, ötən dövrdə təkcə Babək rayonunda dövlətimiz tərəfindən 3 şəhid ailəsinə və 2 qaziyə mənzil, 3 qaziyə isə minik avtomobili verilib, onların tibbi müayinələri və özünüməşğulluq məsələlərinin həlli diqqətdə saxlanılıb. Ölkəmizin ərazi bütövlüyü uğrunda canından keçmiş şəhidlərin ailələri və qazilər ziyarət olunur, onların sosial qayğıları həll edilir.

Sonra “Kəlbəcərin azad olunmasına görə”, “Suqovuşanın azad olunmasına görə” və “Füzulinin azad olunmasına görə” medalları və 3-cü dərəcəli “Rəşadət” ordeni şəhidlərin ailələrinə, qazilərə və müharibə iştirakçılarına təqdim olunub. Onlar göstərilən diqqət və qayğıya görə dövlətimizə minnətdarlıq ediblər.

X X X

Ordubad rayonunda keçirilən tədbir də şəhidlərimizin əziz xatirəsinin anılması ilə başlayıb.

Rayon icra hakimiyyətinin başçısı Elşad Məmmədov çıxışında vurğulayıb ki, Azərbaycan xalqı 30 illik həsrətə son qoyaraq qanı, canı bahasına torpaqlarımızı düşmən tapdağından azad edən igid oğulları ilə hər zaman qürur duyacaq.

Sonra “Füzulinin azad olunmasına görə” medalı ilə təltif olunmuş şəhid kapitan Ülvi Hüseynovun, əsgər Saday Məmmədəliyevin və “Suqovuşanın azad olunmasına görə” medalı ilə təltif olunmuş şəhid baş leytenant Namiq Xəlillinin və gizir Rufiz Budaqovun medalları ailə üzvlərinə təqdim edilib.

“Füzulinin azad olunmasına görə” medalı ilə təltif olunan ehtiyatda olan baş leytenant Sahil Hacıbəyli göstərilən diqqətə görə minnətdarlığını bildirib.

X X X

Muxtar respublikanın Culfa, Şahbuz və Sədərək rayonlarında da şəhid ailələrinə, qazilərə və Vətən müharibəsi iştirakçılarına orden və medallar təqdim edilib. Bununla əlaqədar keçirilən tədbirlərdə vurğulanıb ki, torpaqlarımız uğrunda gedən döyüşlərdə şəhid olan igid Vətən oğullarının qəhrəmanlıq və şücaəti gələcək nəsillərə örnəkdir.

Qeyd edilib ki, bu gün muxtar respublikada şəhid ailələri, qazilər və Vətən müharibəsi iştirakçıları hərtərəfli qayğı ilə əhatə olunublar.

Çıxış edənlər göstərilən diqqət və qayğıya görə dövlətimizə minnətdarlıqlarını bildiriblər.