Naxçıvan, 16 yanvar, AZƏRTAC

“2018-2025-ci illərdə Naxçıvan Muxtar Respublikasında rəsmi statistikanın inkişafına dair Dövlət Proqramı”nın icrası istiqamətində görülən işlər və həmin proqrama uyğun olaraq Naxçıvan Muxtar Respublikası Dövlət Statistika Komitəsində Statistik Məlumatlar Sisteminin yaradılması komitənin fəaliyyətini günün tələbləri səviyyəsində qurmasına imkan verir.

AZƏRTAC-ın Naxçıvan bürosu xəbər verir ki, bu fikir muxtar respublikanın Dövlət Statistika Komitəsində 2019-cu ildə görülmüş işlər və 2020-ci ildə qarşıda duran vəzifələrlə bağlı keçirilən iclasda səsləndirilib.

Komitənin sədri Vaqif Rəsulov bildirib ki, Ali Məclis Sədrinin “Naxçıvan Muxtar Respublikasında əhalinin siyahıyaalınmasına yardım komissiyasının yaradılması haqqında” Sərəncamının icrası ilə əlaqədar yaradılan komissiyanın qərarı ilə təsdiq edilmiş iş planına əsasən müəyyən işlər həyata keçirilərək, 2019-cu il oktyabr ayının 1-dən 10-dək muxtar respublikada əhalinin növbəti siyahıyaalınması təmin edilib. Əhalinin siyahıyaalınmasında sorğu yolu ilə əldə olunan fərdi göstəricilərin elektron məlumat bazasına daxil edilərək yekun məlumatların əldə edilməsi məqsədilə yeni server quraşdırılıb, proqram təminatı hazırlanıb. Həmçinin komitə tərəfindən muxtar respublikanın sosial-iqtisadi inkişafı ilə bağlı təhlili materialların hazırlanaraq kütləvi informasiya vasitələrində dərc etdirilməsi diqqətdə saxlanılıb, 2019-cu ildə, ümumilikdə, 126 adda təhlili, o cümlədən 28 tematik material hazırlanıb.

“Ötən dövr ərzində şəhər və rayon statistika idarələri ilə birlikdə, ümumilikdə, 69 min 419 təsərrüfat subyektindən 100 min 701 sayda hesabat yığılıb ki, bunların da 100 faizi onlayn rejimində təqdim olunub. Hesabatlar əsasında muxtar respublika üzrə iqtisadi, sosial, demoqrafik və ekoloji sahələrin vəziyyətinə dair göstəricilər əldə edilib”, - deyən Vaqif Rəsulov bildirib ki, 2019-cu ildə muxtar respublikanın inzibati ərazi dairələrində 114 min 269 təsərrüfat subyektinə dair göstəricilərin aktuallaşdırılması da təmin edilib. Statistik vahidlərin Dövlət reyestrində qeydiyyatda olan 1954 təsərrüfat subyektinin göstəricilərinin aktuallaşdırılması nəzərdə tutulan vaxtda başa çatdırılıb.

Vurğulanıb ki, bəhs olunan dövrdə, ümumilikdə, 644 müxtəlifməzmunlu sənəd daxil olub və icrası vaxtında təmin edilib. Bundan əlavə, vətəndaşlar tərəfindən komitənin elektron poçt ünvanlarına 7, yazılı surətdə isə 2 müraciət, Azərbaycan Respublikası Dövlət Statistika Komitəsindən elektron sənəd dövriyyəsi sisteminə isə 6 kollegiya qərarı, 33 məktub daxil olub. Kollegiya qərarları işə alınıb, digər müraciət və məktublar isə qanunvericiliklə nəzərdə tutulmuş vaxtda cavablandırılıb.

İclas məruzə ətrafında çıxışlarla davam edib.