Xaçmaz, 30 noyabr, Elxan Yusifli, AZƏRTAC

Xaçmaz rayonunun ərazisində yerləşən Nabran istirahət zonası Azərbaycanın ən böyük turizm potensialı olan bölgələrindəndir. Burada hazırda 80-dən çox müxtəlif turizm obyekti fəaliyyət göstərir. Lakin əksər istirahət mərkəzlərinin turistlərə xidmət dövrü yalnız yay ayları ilə məhdudlaşır. İstirahət zonasına daxil olan yaşayış məntəqələrində bəzi infrastruktur layihələrini icra etməklə Nabrana ilboyu yerli və əcnəbi turistləri cəlb etmək mümkündür. Bundan da yerli sahibkarlar və dövlət büdcəsi xeyli gəlir əldə edə bilər. 

Nabran istirahət zonasının qazlaşdırılması başa çatdırıldıqdan sonra 

turistlər qış aylarında da bu məkana üz tutacaq 

Nabran istirahət zonasında təbii qazın olmaması payız-qış mövsümündə istirahət mərkəzlərində əlavə çətinliklər yaradır. Bu səbəbdən soyuq aylarda, demək olar, əksər obyektlərin fəaliyyəti məhdudlaşır. Amma növbəti mövsümdən bu çətinliklər arxada qalacaq. Hazırda Azəriqaz” İstehsalat Birliyi tərəfindən Nabran qəsəbəsi də daxil olmaqla, ərazidəki 20-yə yaxın yaşayış məntəqəsinin qazlaşdırılması işləri həyata keçirilir. Xanoba, Səlimoba, Yaquboba, Tel və Günəşli kəndlərində qaz çəkilişi yekunlaşmaq üzrədir. Yaxın gələcəkdə Nabran, Meşəli, Pərdiqıran, Vələmir və digər kəndlərin də qazlaşdırılması başa çatdırılacaq. İstirahət zonasında yerləşən kəndlərin qazlaşdırılması ərazidəki meşələrin qorunması ilə yanaşı, sahibkarların qış aylarında turizm obyektlərinin qızdırılması xərclərini xeyli azaldacaq.

Nabran istirahət zonasında fəaliyyət göstərən çoxsaylı turizm obyektlərinin

elektrik təchizatında ciddi dönüş yaranıb

2015-ci ilin dekabr ayında “Azərişıq” Açıq Səhmdar Cəmiyyəti tərəfindən Xaçmaz rayonunun Seyidlikəndyeri kəndində 35/10 kilovoltluq yeni, müasir avadanlıqlarla təchiz olunan yarımstansiya istifadəyə verilib. Yarımstansiyanın inşa olunması Nabran istirahət zonasında və ətraf yaşayış məntəqələrində həm əhalinin, həm də ərazidə fəaliyyət göstərən çoxsaylı turizm obyektlərinin elektrik təchizatında ciddi dönüş yaradıb. Yeni inşa olunan yarımstansiya Nabran turizm zonasında 80-ə yaxın istirahət mərkəzinin elektrik təchizatının yaxşılaşdırılmasında böyük rol oynayır.

Çirkab suları dənizə axıdılmayacaq

Nabranda mərkəzləşdirilmiş sutəmizləyici qurğunun yoxluğu da əsas problemlərdən sayılır. Çirkab sularının Xəzər dənizinə axıdılmasının aradan qaldırılması istiqamətində işlərə başlanılıb. “Azərsu” ASC tərəfindən Xudat şəhəri, Nabran qəsəbəsi, eyni zamanda, həmin ərazidəki istirahət mərkəzlərinin tullantı sularının Xəzər dənizinə axıdılmasının qarşısını almaq üçün müvafiq layihənin icrası nəzərdə tutulub. Bunun üçün, ilk növbədə, “Azərsu” ASC-nin “Sukanal” Elmi-Tədqiqat və Layihə İnstitutunun mütəxəssisləri ərazidə mühəndis-axtarış prosesinə başlayıb. Növbəti mərhələdə isə layihələndirmə işləri həyata keçiriləcək. Su təmizləyici qurğuların quraşdırılması yalnız Nabran istirahət zonasını əhatə etməyəcək. Xəzər dənizinin sahil boyunca Şabran və Siyəzən rayonları ərazisində də çirkab sularının təmizlənməsi üçün avadanlıqların yerləşdirilməsinə başlanılıb.

Onu da qeyd edək ki, Nabran istirahət zonasına turistlərin rahat gəliş-gedişini təmin etmək üçün Xudat-Nabran avtomobil yolunun da yenidən çəkilməsi nəzərdə tutulur.

 Nabranda infrastruktur layihələrinin icrası turizmin inkişafına töhfə verəcək

Heç şübhəsiz ki, Prezident İlham Əliyevin bu il sentyabrın 1-də imzaladığı “Azərbaycan Respublikasında turizmin inkişafı ilə bağlı əlavə tədbirlər haqqında” Sərəncam Nabran istirahət zonasının əvvəlki şöhrətini özünə qaytarmasında əhəmiyyətli rol oynayacaq. Sərəncamdan irəli gələn məsələlərin icrası Nabrana daha çox yerli və əcnəbi turistlərin gəlməsinə şərait yaradacaq.

Qeyd edək ki, şimal regionu respublikanın həm də zəngin kurort rekreasiya zonalarından biridir. Quba-Xaçmaz zonasında müxtəlif müalicəvi əhəmiyyətli mineral sular, Xəzər dənizi sahili boyu 35-40 kilometr məsafədə uzanan Nabran-Yalama kurort məkanı, əlverişli iqlim şəraiti, meşə örtüyü və digər təbii-rekreasiya ehtiyatları var.

Bölgənin turizm imkanlarının daha geniş təbliğ olunması, turistlərə yerli turizm məhsullarının və marşrutlarının təqdim edilməsi, həmçinin bu sahədə xidmətlərin göstərilməsi məqsədilə Mədəniyyət və Turizm Nazirliyi tərəfindən Xaçmaz, Quba və Qusar turizm informasiya mərkəzləri yaradılıb. Bu mərkəzlər regionun qonaqlarına və turistlərə ekskursiya, bələdçilik və digər xidmətlər göstərir, bir sıra beynəlxalq turizm sərgilərində müvəffəqiyyətlə iştirak edirlər.

Bir sözlə, əminliklə demək olar ki, Nabranda infrastruktur layihələrinin icrası Azərbaycan iqtisadiyyatının qeyri-neft sektorunda aparıcı sahəyə çevrilən turizmin inkişafına öz töhfəsini verəcək.