NAOMİ KEMPBELL DÖŞƏMƏ SÜPÜRƏCƏK
AZƏRTAC xəbər verir ki, “Tayms” qəzetinin yazdığına görə, öz qulluqçusu Ana Skolavinonu vurduğuna görə məhkəmənin qərarı ilə 5 günlük ictimai cəzaya məhkum edilən britaniyalı model Naomi Kempbell martın 19-dan zibil maşınları qarajında döşəməni süpürəcəkdir. Qəzetin yazdığına görə, məhkəmə 36 yaşlı Naomi Kempbellin vəkillərinin xahişi ilə ona fotomüxbirlərin gözündən iraq, bağlı yerdə iş təyin etmişdir. Model ictimai işləri başa çatdırandan sonra qəzəbinin idarə edilməsi üçün ikigünlük kurs keçəcək və qulluqçusunun 363 dollar məbləğində tibbi xərclərini ödəyəcəkdir.
Xatırladaq ki, çılğın və sərt xarakteri ilə tanınan Naomi yanvar ayında mobil telefonu Ana Skolavinonun başına vurmuşdu. Başına 4 tikiş qoyulan qulluqçu modeli məhkəməyə vermişdir. Məhkəmədə hadisəni “təsadüf” kimi qələmə verən Kempbell təqsirini boynuna almış və Anadan rəsmən üzr istəmişdir.
Bölmənin digər xəbərləri
