Naxçıvan karateçiləri 25 medal qazanıblar
Naxçıvan, 18 may, AZƏRTAC
Ümummilli lider Heydər Əliyevin anadan olmasının 99-cu ildönümü münasibətilə fudokan (ənənəvi karate üslubu) üzrə birinci açıq Sumqayıt şəhər birinciliyi və çempionatında Naxçıvan Karate-do Federasiyasının idmançıları uğurlu nəticələr əldə ediblər.
Naxçıvan Muxtar Respublikası Gənclər və İdman Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, Naxçıvan karateçiləri 8-i qızıl, 4-ü gümüş, 13-ü bürünc olmaqla, toplamda 25 medal qazanıblar.
Qeyd edək ki, Naxçıvan Karate-do Federasiyasının 9 idmançısı və 1 məşqçi Bolqarıstanın Albena Kranevo şəhərində keçiriləcək XII Avropa Şotokan Çempionatında iştirak edəcək. Dünya Şotokan Federasiyasının təşkilatçılığı ilə keçiriləcək yarışda müxtəlif yaş kateqoriyaları üzrə idmançıların, həmçinin paralimpiyaçıların iştirakı nəzərdə tutulub.