REGİONLAR
“Naxçıvan kuboku – 95” beynəlxalq turniri başa çatıb
Naxçıvan, 18 oktyabr, AZƏRTAC
Naxçıvan Muxtar Respublikası Gənclər və İdman Nazirliyi, Azərbaycan Futbol Federasiyaları Assosiasiyası və Naxçıvan Futbol Federasiyasının birgə təşkilatçılığı ilə keçirilən 13-14 yaşlı futbolçular arasında “Naxçıvan kuboku - 95” beynəlxalq turnirinə yekun vurulub.
AZƏRTAC-ın Naxçıvan bürosu xəbər verir ki, son turun oyunları Naxçıvan Muxtar Respublika Stadionunda keçirilib.
4 komandanın aktivində olan 3 xal beynəlxalq turnirin gərginliyindən xəbər verirdi. İlk oyunda meydana “Rekord” və “Qaraqalpaqıstan” komandaları çıxıb. Özbəkistan təmsilçisi ilk iki turda məğlub olsa da, sonradan qazandığı qələbə sayəsində mükafatçılar sırasına düşmək şansını finala kimi saxlayıb. Azərbaycan klubunun isə gözlənilmədən son turda “Qarabağ”ı məğlub etməsi turnirə olan marağı xeyli artırıb. Odur ki, hər iki komanda oyuna sürətli hücumlarla başlayıb. Daha üstün oyun sərgiləyən “Qaraqalpaqıstan” komandası rəqibin müdafiə xəttini yarmaqda çətinlik çəkməyib və görüş 6:0 hesablı qələbə ilə başa çatıb.
Günün ikinci qarşılaşmasından öncə Azərbaycan Respublikasının dövlət himni səsləndirilib.
Meydana çıxan “Araz-Naxçıvan” və “Qarabağ” komandaları ilk hissədə bir neçə imkandan yararlana bilməyiblər. Hətta Naxçıvan klubu 28-ci dəqiqədə rəqib qapısına təyin olunan penalti zərbəsindən istifadə edə bilməyib. Bu epizodda qapıçının sərgilədiyi oyun azarkeşlər tərəfindən alqışlarla qarşılanıb.
İkinci hissədə isə “Qarabağ” hakimin təyin etdiyi penalti zərbəsini dəqiq yerinə yetirib. Bu, oyunda vurulan tək qol olub. Həmin qələbə sayəsində “Qarabağ” aktivindəki xalların sayını 6-ya yüksəldib və fərdi oyunlara görə turnir cədvəlinin ikinci pilləsində yer alıb.
Turnirin yekun nəticəsinə gəlincə, Özbəkistan Respublikasının “Əndican” komandası 12 xalla ilk dəfə təşkil olunan “Naxçıvan kuboku - 95” beynəlxalq turnirinin qalibi olub. 6 xal toplayan Azərbaycanın “Qarabağ” komandası gümüş, digər özbək təmsilçisi “Qaraqalpaqıstan” komandası isə bürünc medal qazanıb.
Beynəlxalq turnirin ən məhsuldar futbolçusu adına “Qaraqalpaqıstan” komandasının hücumçusu Makset Kalbayev layiq görülüb. Ən yaxşı futbolçu nominasiyasının qalibi isə “Əndican” komandasının təmsilçisi Oktam Abdulmalikov seçilib. Oyunları idarə edən hakimlər təşkilatçılar tərəfindən plaketlərlə təltif olunublar. AFFA nümayəndəsinə isə təşəkkürnamə təqdim edilib. Mükafatları Naxçıvan Muxtar Respublikası Gənclər və İdman naziri, Futbol Federasiyasının sədri Azad Cabbarov və “Naxtel” Məhdud Məsuliyyətli Cəmiyyətin icraçı direktoru Kamil Yusifov təqdim ediblər. Qalib komandalara medal və kubok, eyni zamanda, nominasiyanın qalibi olan futbolçulara “Naxtel”in xüsusi hədiyyələri verilib. Turnirdə iştirak edən bütün futbolçular isə Naxçıvan Muxtar Respublikası Gənclər və İdman Nazirliyinin və Futbol Federasiyasının hədiyyələri ilə mükafatlandırılıblar.
AZƏRTAC-ın Naxçıvan bürosunun əməkdaşları yarış başa çatdıqdan sonra “Naxçıvan kuboku - 95” beynəlxalq turnirinin nəticələri barədə qonaqların fikirlərini öyrəniblər. “Qaraqalpaqıstan” komandasının direktoru Timur Turdiyev deyib: “Turnir ərzində bizə göstərilən qonaqpərvərliyi xüsusilə qeyd etməliyəm. Onu da deyim ki, futbolçularla birgə Naxçıvanı gəzmək imkanımız oldu. Duzdağ Fizioterapiya Mərkəzi və Heydər Əliyev Muzeyinə olan ekskursiyalar, xüsusilə yadda qaldı. Naxçıvan Şərqin ən təmiz şəhəridir. Hər axşam şəhəri gəzəndə yolların təmizləndiyini görürdüm. Bura sanki mənə Avropanı xatırladır. Eyni zamanda, sakit və qonaqpərvər olması bizdə dərin iz buraxdı.
Turnirdə komandam üçüncü oldu. Halbuki bu yeri də tutmaya bilərdik. Son oyuna kimi mübarizə getdi. Bu da turnirin gərgin mübarizə şəraitində keçdiyini göstərir. İndi vətənimizə bürünc medalla yollanırıq. Bu, bizim üçün böyük bir uğurdur. Gələcək illərdə Naxçıvanla əməkdaşlığımız davam edəcək və keçiriləcək turnirlərdə muxtar respublikanın da komandasını dəvət edəcəyik. Turnirin təşkilatçıları ilə görüşümüz oldu, növbəti ildə də bu turnirdə iştirak edəcəyimizi bildirdik. Sağ olsunlar ki, onlar bu təklifimizi müsbət qarşıladılar. Hər şey üçün təşəkkürlər, Naxçıvan!”.
Turnirin bombardiri, “Qaraqalpaqıstan” komandasının futbolçusu Makset Kalbayev: “Bu, mənim ölkə xaricində iştirak etdiyim və ilk titul qazandığım turnirdir. Odur ki, Naxçıvanı həmişə ən xoş arzularla xatırlayacağam. Etiraf edim ki, bombardir olacağımı düşünmürdüm. Sadəcə, məni maraqlandıran komandamın qələbəsi və evə “əliboş” dönməməyimiz idi. Buna da nail olduq. Bürünc medal kifayət qədər böyük uğurdur. Son tura kimi mübarizə getdi və komandam burada fəxri kürsüyə çıxmağa müvəffəq oldu. Təşkilatçıların hər birinə təşəkkür edirik”.
Turnirin “Ən yaxşı futbolçusu”, “Əndican” komandasının üzvü Oktam Abdulmalikov: “Uzun müddətdir ki, bu komandanın heyətində çıxış edirəm. Ölkədaxili və bir sıra beynəlxalq turnirlərdə mübarizə aparmışam. Deyərdim ki, Naxçıvan bunlar arasında ən yaxşısıdır. Səbəbi isə böyük futbol bazasının olmasıdır. Biz bir həftədir, Şərur Olimpiya İdman Kompleksində qalırıq. Burada insanlar bizə çox isti münasibət göstərir, hətta kompleksə gəlib bizimlə şəkil çəkdirir, bizi öz evlərinə qonaq edirlər. Bu, naxçıvanlıların necə qonaqpərvər olduğunu göstərir”.
“Qarabağ” Futbol Klubunun uşaq akademiyasının məsul işçisi Elvin Süleymanov: “Naxçıvanda ilk dəfədir ki, belə bir turnirdə iştirak edirik. Ümumiyyətlə, bura bizim klub üçün düşərli məkandır. Əsas komandamız burada Azərbaycan kubokunun qalibi olub.
Uşaq futboluna Naxçıvanda böyük diqqət göstərilir. Elə turnirin təşkilatçılığı da bunu deməyə imkan verir. Burada bizim üçün hər bir şərait yaradılıb və futbolçularımızın rahatlığı təmin olunub. Bildiyimə görə, bu turnir artıq ənənə halını alacaq və hər il təşkil olunacaq. Komandamız üçün yenidən “Naxçıvan kuboku”nda iştirak etmək qürurverici olardı. “Qarabağ” ilk turnirdə gümüş medal qazandı, lakin gələcək illərdə bunu qızılla əvəzləyəcəyimizə söz verirəm. Təşkilatçılara bir daha minnətdarlığımızı bildirirəm”.