Naxçıvan, 6 iyun, Rauf Kəngərli, AZƏRTAC

Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş “Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi”nə əsasən verilmiş tapşırıqların icrası məqsədilə Azərbaycan Respublikası Mərkəzi Bankı tərəfindən ölkə ərazisində nağdsız ödənişlərin genişləndirilməsi, xüsusən də regionlarda əhali və təsərrüfat subyektləri arasında müasir bank texnologiyalarından istifadənin artırılması üçün maarifləndirmə, təbliğat və təşviqat işlərinin aparılmasına xüsusi diqqət yetirilir.

AZƏRTAC-ın Naxçıvan bürosu xəbər verir ki, bu istiqamətdə növbəti tədbirlərdən biri qlobal ödəniş texnologiyalarının lideri olan “Mastercard” ilə birlikdə pilot bölgə olaraq seçilmiş Naxçıvan Muxtar Respublikasında rəqəmsal ödənişlərin istifadəsinin stimullaşdırılması məqsədilə istehlakçılar və təsərrüfat subyektləri üçün kampaniyaların təşkil edilməsidir.

Naxçıvan şəhərində təşkil olunan belə kampaniyaların təqdimatı üzrə Mərkəzi Bankın Naxçıvan Muxtar Respublikası İdarəsində keçirilən tədbirdə çıxış edən Naxçıvan Muxtar Respublikasının maliyyə naziri Səbuhi Məmmədov son illərdə muxtar respublika rəhbərinin tapşırığına əsasən nağdsız ödənişlərin genişləndirilməsi istiqamətində görülmüş işlər barədə geniş məlumat verib. Qeyd edib ki, nağdsız ödəniş infrastrukturunun genişləndirilməsi, inkişaf etdirilməsi və hesablaşmaların həcminin artırılması muxtar respublikada daim diqqət mərkəzində olub, ötən dövrdə bu istiqamətdə iki dövlət proqramı təsdiq olunaraq icra edilib. Naxçıvan Muxtar Respublikası Ali Məclisi tərəfindən 2013-cü il sentyabrın 5-də təsdiq edilmiş 2013-2015-ci illəri əhatə edən “Naxçıvan Muxtar Respublikasında elektron ödəniş məkanının formalaşdırılması və nağdsız hesablaşmaların həcminin artırılması” üzrə Tədbirlər Planına və Naxçıvan Muxtar Respublikası Ali Məclisi Sədrinin 2016-cı il 2 mart tarixli Sərəncamı ilə təsdiq edilmiş “2016-2018-ci illərdə Naxçıvan Muxtar Respublikasında müasir elektron ödəniş xidmətlərinin tətbiqinin və nağdsız hesablaşmaların genişləndirilməsi üzrə Proqram”ına uyğun olaraq nağdsız ödənişlərin miqyasının genişləndirilməsi, elektron ödəniş xidmətlərindən istifadə aktivliyinin artırılması, inkişaf etdirilməsi, iqtisadi fəaliyyət göstərən şəxslərin və əhalinin elektron ödəniş sistemlərindən daha fəal istifadə etməsi, ticarət, iaşə və digər xidmət müəssisələrində hesablaşmaların ödəniş kartları vasitəsilə aparılması üçün müvafiq tədbirlər həyata keçirilib.

“Həyata keçirilmiş tədbirlər çərçivəsində banklar tərəfindən Naxçıvan şəhəri, rayonlar və kənd mərkəzlərində POS-terminalların quraşdırılması işi davam etdirilib, onların sayı 2018-ci il 1 may tarixinə 1266 ədədə çatdırılıb”, – deyən Səbuhi Məmmədov bildirib ki, əhalinin nağdsız ödənişlərə marağının artırılması məqsədilə Vergilər Nazirliyinin dəstəyi ilə müxtəlif mükafatlandırma tədbirləri keçirilib və bu tədbirlərdə nağdsız ödənişə üstünlük verən 1537 nəfər muxtar respublika sakininə 100 min manat dəyərində müxtəlif hədiyyələr paylanılıb. Təkcə 2017-ci ildə 481 şəxsə 30 min manat dəyərində hədiyyələr verilib. Aparılan işlərin uğurlu nəticəsi olaraq, nağdsız ödəniş dövriyyəsi illər üzrə dinamik şəkildə artaraq 2014-cü ildə 12 milyon 512 min, 2015-ci ildə 18 milyon 874 min, 2016-cı ildə 27 milyon 701 min, 2017-ci ildə 30 milyon 798 min və 2018-ci ilin ilk 4 ayı ərzində 12 milyon 223 min manat olub. Hazırda aylıq ödəniş dövriyyəsi orta hesabla 3 milyon manat təşkil edir.

Tədbirdə çıxış edən Azərbaycan Respublikası Mərkəzi Bankı sədrinin birinci müavini Alim Quliyev “Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi” ilə Mərkəzi Banka verilmiş rəqəmsal ödənişlərin daha geniş tətbiqi tapşırığının icrası istiqamətində görülən işlər barədə məlumat verib. O, “Mastercard” beynəlxalq kart təşkilatı ilə birgə ölkədə rəqəmsal ödənişlərin inkişafı üçün institusional mühitin yaxşılaşdırılması, iqtisadiyyatda nağd pul dövriyyəsinin azaldılması və nağdsız ödənişlərin genişləndirilməsi istiqamətində ötən il həyata keçirilmiş “Nağdsız Azərbaycan” layihəsi barədə danışaraq qeyd edib ki, bu layihə bütövlükdə ölkənin nağdsız cəmiyyətə transformasiyasına dair təfsilatlı yol xəritəsini özündə ehtiva edir. Layihənin yekunu kimi hazırlanmış “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı” bu istiqamətdə görüləcək işləri əhatə edir.

Alim Quliyev verilmiş tapşırığın icrası çərçivəsində hesablaşma əməliyyatlarının vəsaiti ödəyənlə vəsaiti alan arasında 5-10 saniyə ərzində tam başa çatdırılmasını təmin edən Ani Ödənişlər Sisteminin yaradılması üzrə Mərkəzi Bank tərəfindən görülən işlər barədə də danışıb. Bildirib ki, sistemin yaradılması ilə ödəniş xidmətlərinin fiziki və hüquqi şəxslər üçün hər yerdə, hər zaman əlçatan olmasına və əməliyyatların 24/7/365 rejimində ödənişlərin həyata keçirildiyi anda başa çatdırılmasına nail olunacaq.

“Mastercard”ın Azərbaycan üzrə meneceri Erdem Çakar yerli bazarda uzunmüddətli əməkdaşlığın möhkəmləndirilməsi məqsədilə bu kampaniyanı Naxçıvan Muxtar Respublikasında həyata keçirməkdən qürur duyduqlarını vurğulayıb. O, çıxışında Azərbaycanı nağdsız ödəniş sahəsində regionun lideri və “Mastercard”ın ən mütərəqqi texnologiyalarını tətbiq edən ilk ölkə kimi görmək istədiklərini, son layihələri arasında əsas yeri “Mastercard” və Mərkəzi Bank tərəfindən birgə hazırlanan, ölkədə nağdsız transformasiya strategiyasının yaradılmasına yönələn “Nağdsız Azərbaycan” layihəsinin tutduğunu bildirib.

Tədbirdə iştirakçıları maraqlandıran suallar cavablandırılıb.

Sonra layihə çərçivəsində mayın 28-dən iyunun 28-dək “Cahan” AVM-də təşkil olunmuş hədiyyə kampaniyasının təqdimatı olub. Kampaniyaya əsasən “Mastercard”la buradan 30 manat məbləğində alış-veriş edən hər bir alıcı ödəniş qəbzini müştəri xidmətləri masasına təqdim etməklə müxtəlif hədiyyələrə sahib ola bilər.