Nepalın Baş naziri istefa verib
Bakı, 9 sentyabr, AZƏRTAC
Nepalın Baş naziri Şarma Oli ölkədə baş verən kütləvi etiraz aksiyaları ilə əlaqədar istefa verib.
AZƏRTAC Reuters agentliyinə istinadla xəbər verir ki, bu barədə Baş nazirin köməkçisi Prakaş Silval məlumat yayıb.
Qeyd edək ki, hazırda Katmanduda hökumətin istefası tələbi ilə kütləvi etiraz aksiyaları keçirilir. Aksiya iştirakçıları avtomobil təkərlərini yandıraraq hökumət rayonunda nəqliyyatın hərəkətini dayandırıb. Nepal hakimiyyəti paytaxtda məhdudiyyətsiz komendant saatı tətbiq edib.
Nümayişçilər ötən həftə hökumətin ölkədə sosial şəbəkələr və mesajlaşma proqramlarının fəaliyyətini məhdudlaşdırmaq qərarına, həmçinin korrupsiyaya etiraz edir. Əsasən gənclər və tələbələrdən ibarət aksiya iştirakçıları ilə polis arasında toqquşmalar baş verib. Toqquşmalarda azı 19 nəfər həyatını itirib, 100-dən çox insan isə yaralanıb.
Bölmənin digər xəbərləri
