SİYASƏT
Niderland portalı: Azərbaycan işğaldan azad olunmuş ərazilərin bərpasına və bu torpaqlarda yeni layihələrə start verib
Haaqa, 12 fevral, AZƏRTAC
Niderlandın “EW magazine” portalında Azərbaycanın bu ölkədəki səfiri Fikrət Axundovun məqaləsi dərc olunub.
AZƏRTAC xəbər verir ki, məqalədə Müzəffər Ali Baş Komandan İlham Əliyevin rəhbərliyi ilə şanlı Ordumuzun rəşadəti sayəsində torpaqlarımızın işğaldan azad edilməsindən bəhs olunub.
Bildirilib ki, son dövrlərdə Avropanın Cənubi Qafqaz regionuna marağı artmaqdadır. Bu, ilk növbədə, Cənubi Qafqazın ən güclü ölkəsi olan Azərbaycanın Avropa İttifaqı ilə nəqliyyat, enerji və təhlükəsizlik layihələrində uğurlu iştirakı ilə bağlıdır. Cənubi Qafqaz ölkələrinin Avropa ilə tam və hərtərəfli əməkdaşlığına mane olan ermənilərin 30 illik işğal siyasəti 2020-ci ilin sonunda başa çatdı, Azərbaycan tarixi torpağı olan Dağlıq Qarabağ və onun ətrafındakı 7 rayonu azad etdi. İndi 1 milyondan çox azərbaycanlı qaçqın və məcburi köçkün üçün öz doğma evlərinə qayıtmaq imkanı yaranıb.
Müəllif məqalədə Azərbaycanın BMT Təhlükəsizlik Şurasının 4 qətnaməsinə (822, 853, 874 və 884) əsasən öz ərazisi olan Qarabağın erməni işğalından azad edilməsinin, suveren sərhədlərinin bərpa olunmasının, eləcə də bölgədə sülhün bərqərar olmasının Avropanın bir sıra ölkələrinin parlamentləri tərəfindən qəzəb və dərin narahatçılıqla qarşılanmasına təəssüfünü bildirib. Qeyd edilib ki, bunların arasında Fransa və Benilüks ölkələri, xüsusilə də Niderland fəallığı ilə seçilib. Erməni lobbisinin təsiri altına düşmüş Niderlandın populist partiyalarının bəzi deputatları 2021-ci ilin mart ayında ölkədə keçiriləcək parlament seçkilərində erməni seçicilərin səsini qazanmaq məqsədilə Azərbaycan əleyhinə misli görünməyən 11 qətnamə qəbul ediblər. Bəzi deputatlar hətta Azərbaycana qarşı irqçilik, milliyyətçilik, şovinist hisslərini sosial şəbəkələrdə yayıb, ölkənin erməni lobbisi ilə əlaqələrinin olduğunu gizlətməyiblər. Paralel olaraq, Benilüks ölkələrinin erməni diasporu Niderlanddakı fikir azadlığı kimi dəyərlərdən öz maraqları üçün sui-istifadə edərək, Azərbaycana qarşı qarayaxma kampaniyası aparıb. Niderland parlamentinin bu qətnamələrin heç birində münaqişə zonasından uzaqda yerləşən Azərbaycanın Gəncə, Bərdə, Tərtər kimi şəhərlərinin mülki əhalisinin Ermənistan tərəfindən dəfələrlə “Smerç” tipli raketlərlə hücumlara məruz qalması qınanılmayıb, azərbaycanlı mülki əhalinin hədəfə alınması, məhv edilmiş tarixi, mədəni, dini abidələrlə bağlı susmuş və bununla da parlamentin ədalətli olmadığını bir daha təsdiqləyib. Təəssüf ki, xaricdə yaşayan erməni icması öz vətəninin təbliğatından daha çox Azərbaycanın əleyhinə fəaliyyət aparır və bu lobbinin təsiri altına düşmüş bəzi Avropa, o cümlədən Niderland siyasətçiləri bu məsələdə onlara yaxından yardım edirlər. Bu da öz növbəsində Cənubi Qafqazda sülhün yaradılmasına mane olmağa və artıq keçmişdə qalmış Qarabağ münaqişəsini yenidən alovlandırmağa cəhdə xidmət edir.
Bütün bu maneələrə baxmayaraq, Azərbaycan işğaldan azad olunmuş ərazilərin bərpasına və bu torpaqlarda yeni layihələrə start verib. Avropa və dünya üçün hazırda aktual olan yaşıl enerji, ekologiya, müasir infrastruktur layihələri, ekoturizm və bioqida kimi layihələrə üstünlük verilib. SSRİ-nin süqutundan sonra Azərbaycan-Ermənistan sərhədinin ilk dəfə açılması, Ermənistanın da regional layihələrdən faydalanması, insanlar arasında etimadın yaradılması üçün tarixi şans yaranıb. Lakin Ermənistandakı milliyyətçi və revanşist qüvvələr buna imkan vermək istəmir. Müstəqil siyasət apara bilməyən Ermənistan uzun müddətdir iqtisadi, sosial böhran içindədir. Milli dözümsüzlük nəticəsində monoetnik ölkəyə çevrilmiş Ermənistanda iş yerləri bağlanıb, demoqrafik vəziyyət kəskinləşib. Təəccüblü deyil ki, İsrail Dövlətinin Diaspor Məsələləri üzrə Nazirliyinin dünyada 2020-ci il üzrə antisemitizm sahəsində vəziyyətə dair hesabatında Ermənistanda belə meyillərin son dövrdə olduqca artdığı, yəhudilərə qarşı etnik-dini zəmində hücumların kəskinləşdiyi qeyd edilib.
Vurğulanıb ki, belə hallar regionda sülhün və sabitliyin bərqərar olmasına təhlükə yaradır. Keçən ilin noyabrından bu günə qədər Ermənistanda davam edən siyasi terror, parlament sədrinin ölümcül döyülməsi, parlament binasının zəbt edilməsi, Azərbaycanla sülhə getmək istəyən siyasətçilərin, deputatların hədələnməsi quruculuq layihələrinin həyata keçirilməsinə mane olur. Siyasi böhranla yanaşı, iqtisadi, demoqrafik, sosial və maliyyə sahələrində gərginlik içində yaşayan erməni xalqı Rusiya və Türkiyənin işçi bazarlarına üz tutub. Erməni xalqını bu vəziyyətə salan siyasi elitanın ailə üzvləri və xüsusən baş nazir Nikol Paşinyanın arvadı Anna Akopyan erməni qadınlarını Azərbaycanla müharibə etməyə çağırır, sonra isə özü iki qızı ilə birgə Moskvanın bahalı restoranlarında gecə həyatı sürür, Moskva şəhərində özünə bahalı mənzil axtarır. Xalqın ağır vəziyyətdə olmasına baxmayaraq, Ermənistanın birinci xanımı ad gününü Los-Ancelesdə qeyd edib və bu da sadə ermənilərin haqlı qəzəbinə səbəb olub. Moskva və Los-Anceles hava limanlarında ona qarşı yerli ermənilər tərəfindən piketlər keçirilir. Bu kimi addımlarla öz xalqını yoxsul vəziyyətə salan Ermənistan hökuməti, ilk növbədə, həmsərhəd olduğu 4 ölkədən 3-nə qarşı ərazi iddialarından əl çəkməli və müharibə partiyasının “qədim əsrlərdə üç dəniz arasında yerləşmiş böyük Ermənistan” xəyalından əl çəkməlidir.
BMT institutlarının hesablamasına əsasən, keçmiş SSRİ-nin ən monomilli respublikası olan hazırkı Ermənistanda əhalinin sayı kəskin azalır. Əhalisi 2,7 milyon olan Ermənistanın xaricində 8 milyon erməni yaşayır, lakin onlar öz vətəninə qayıtmaq istəmirlər.
Bildirilib ki, Ermənistandan fərqli olaraq, Azərbaycan və Gürcüstan həmişə mehriban qonşuluq prinsipinə riayət edib, bu ölkələrdə kilsə və məscidlərə eyni qayğı göstərilib.
Diqqətə çatdırılıb ki, Azərbaycan Cənubi Qafqazda, eləcə də İslam dünyasında ən böyük - 30 minlik yəhudi icmasının vətənidir. Azərbaycanda məscidlərlə yanaşı, sinaqoqlar, katolik və pravoslav kilsələri, alman, gürcü və erməni kilsəsi də dövlət tərəfindən qorunur. İki dəfə Azərbaycanı ziyarət edən Roma Papası bu ölkənin tolerantlıq nümunəsi olduğunu bəyan edib.
Ermənilərin Cənubi Qafqaza və xüsusən də Azərbaycana, Azərbaycanın Dağlıq Qarabağ bölgəsinə vaxtilə İran və Türkiyədən köçürülməsinə baxmayaraq, Azərbaycan xalqı ermənilərə öz tolerantlığını nümayiş etdirib. Rusiya imperiyası dağıldıqdan sonra - 1918-ci ildə cümhuriyyət dövründə Azərbaycan şəhəri olan İrəvan Ermənistana verilib. Bu barədə tarixi sənədlər mövcuddur.
Vurğulanıb ki, 2020-ci il noyabr ayının 10-da Azərbaycan, Ermənistan və Rusiya rəhbərləri səviyyəsində imzalanmış üçtərəfli Bəyanatdan sonra humanitar məsələlər həyata keçirilməyə başlanıb. Azərbaycan öz öhdəliklərinə sadiq qalaraq, 59 nəfər müharibə əsirini Ermənistana təhvil verib. Ancaq Ermənistan tərəfi sülhə zidd addımlar atmaqda davam edir. Müharibə bitəndən sonra - 2020-ci il noyabrın 26-da 62 nəfərdən ibarət terror-təxribat qrupu Ermənistandan Azərbaycan ərazisinə daxil olub və terror əməliyyatı həyata keçirməyə cəhd ediblər. Bu terror qrupu Azərbaycan Silahlı Qüvvələrinin 4 hərbi qulluqçusunu qətlə yetirib, 2 hərbi qulluqçunu və 1 mülki şəxsi yaralayıb. Sözügedən təxribat qrupu Azərbaycan tərəfindən saxlanılıb və onlar barədə Azərbaycan qanunvericiliyinə uyğun olaraq, cinayət işi başlanıb. Ərazilərimizdə terror törətmək məqsədilə göndərilən bu təxribat qrupunu Ermənistan hərbi əsirlər kimi qələmə verməyə cəhd edir. Beynəlxalq hüquq isə belə cəhdlərin tamamilə əsassız olduğunu göstərir.
Şəhla Ağalarova
AZƏRTAC-ın xüsusi müxbiri
Haaqa