DÜNYA
NİYYƏT PROTOKOLU İMZALANMIŞDIR
“Azərenerji” Səhmdar Cəmiyyəti ilə Yaponiyanın “Mitsubişi” şirkəti arasında niyyət protokolu imzalanmışdır. SC-nin mətbuat xidmətindən bildirmişlər ki, tərəflər Sumqayıtdakı 1 nömrəli istilik-elektrik mərkəzinin ərazisində yeni blokun tikintisinin texniki-iqtisadi əsaslandırılmasının (TİƏ) hazırlanması haqqında razılığa gəlmişlər.
Protokolda TİƏ-nin başqa bir yapon məsləhətçi şirkəti tərəfindən işlənib hazırlanması nəzərdə tutulur. Razılaşmaya görə, TİƏ iki alternativ variantda hazırlanmalıdır. Birinci varianta uyğun olaraq, ümumi gücü 400 MVt olan bir qaz və bir buxar turbinindən ibarət yeni qurğular istifadəyə verilməlidir. İkinci variantda ümumi layihə gücü 500 MVt olan iki qaz və bir buxar turbini quraşdırılması nəzərdə tutulur.
Bundan əvvəl “Azərenerji” İsveçrənin “Alstom” şirkəti ilə niyyət protokolu imzalamışdı. Həmin sənədə görə, Sumqayıt İEM-1-in ərazisindəki yeni qurğuların istifadəyə verilməsi üçün də TİƏ hazırlanmalıdır. “Azərenerji” rəhbərliyi layihəyə yeni şirkətlər cəlb etməklə, ölkəmiz üçün daha sərfəli layihəni cari il yayın sonunadək seçmək fikrindədir.
Yeni qurğuların istifadəyə verilməsi ölkənin istər bütün, istərsə də yerli enerji sisteminin inkişafı üçün son dərəcə vacibdir. Belə ki, Abşeron yarımadasının, habelə Sumqayıt ərazisində yerləşən və özəlləşdirmə ilə əlaqədar dirçəlməkdə olan enerji tutumlu kimya kompleksi və sənaye müəssisələrinin elektrik enerjisinə tələbatı tamamilə ödəniləcəkdir.