O qatar mütləq gələcək...
Naxçıvan, 26 sentyabr, AZƏRTAC
Şərur şəhərini iki yerə bölən dəmir yolu xətti var. Sovet dönəmində üzərində böyük körpü də inşa olunmuşdu.
İnsanlar qatarla Bakıdan yola düşüb, Mehridən keçərək Şərur şəhərinə gəlirdilər. Bu yol həm də İrəvana kimi uzanırdı. Rusiyanın müxtəlif şəhərlərindən gələn qatarlar Ermənistanın dağlıq relyefinin əlverişsiz şəraitinin çətinliyinə görə məhz Mehridən Naxçıvan Muxtar Respublikası ərazisinə keçir, buradan İrəvana çata bilirdi.
Azərbaycan dövlət müstəqilliyini bərpa etdiyi o çətin günlərin birində Şərur sakinləri qatar yolunun üzərində toplaşıb həmin yolu kəsdilər. Çünki bundan əvvəl ermənilər Mehri yolundan keçən Bakı-Şərur (əvvəlki adı Bakı-Noraşen) qatarının qarşısını kəsib, sərnişinləri əsir götürmüşdülər. Həmin gün Şərur şəhərindən keçən qatar yolunda toplaşan insanlar sanki dəmir səddə dönüb, Mehridə baş verən hadisəyə öz etirazlarını bildirirdilər.
AZƏRTAC-ın bölgə müxbiri həmin hadisələrin canlı şahidi, Şərur sakini Kərim Əliyevlə elə Şərur qatar stansiyasında həmsöhbət olub, onun xatirələrini dinləyib.
O deyib: “Bu o günlər idi ki, sovetlərin əcəl zənginin çalınmasından istifadə edən ermənilər Qarabağa və Naxçıvana silahlı hücuma başlamışdılar. Mehridən keçib gələn qatarların qarşısını kəsməklə qalmayıb insanlara xəsarət yetirir, onları qarət edirdilər. Naxçıvana gələn mavi yanacaq və elektrik xətti də ermənilər tərəfindən kəsilmişdi. Vaxtilə onlara “hədiyyə” edilən Zəngəzur düşmənin əlində fürsətə çevrilmişdi. Həmin çətin günlərdən sonra qatarlar bir daha gəlməz oldu. Şərur vağzalında həmin qatarların səsi kəsildi. Dəmir yolunun üzərindəki körpü də söküldü. Sonralar hər səhər tezdən təkcə Sədərəkdən Ordubada üz tutan qatarın siqnal səsi eşidilməyə başladı”.
Kərim kişi deyir ki, Bakı-Şərur qatarı ilə tez-tez ölkəmizin digər ərazilərinə səyahət edir, əzizləri ilə görüşürdülər. Çox insanın xəyalları yaşayırdı bu perronda. “Oğullarını uzaq Rusiyanın ucqar yerlərinə hərbi xidmətə göndərən anaların gözləri aylarla bu yolda qalırdı. Hətta bu qatarla Şərura gəlin də gətirmişdik. Bəzən də arxasınca nigaran nəzərlərlə, pərişan halda baxdığımız qatarlar yola salmışdıq bu stansiyadan. Elə ona görə də bizim üçün bu yol təkcə dəmir relslər deyil, həm də keçmişin xatirələrinin yaşandığı yoldur.
Müzəffər Ordumuzun tarixi Zəfəri, Prezidentimizin sülh meydanında qazandığı nailiyyətlərlə içimizdəki ümid yenidən şölələnib. İnanıram ki, tezliklə insanları bir-birinə qovuşduran, Azərbaycanımızın digər bölgələrini Naxçıvanla birləşdirən dəmir yolunda qatarın səsini yenidən eşidəcəyik ”, - deyə o vurğulayıb.
Nə az, nə çox, düz 35 il ötür bu relslərin üzəri ilə Bakıdan yola çıxıb Şərura son qatarın yetişməsindən. İnanırıq ki, Prezident İlham Əliyevin hərb meydanında olduğu kimi, sülh müstəvisində də qazandığı tarixi nailiyyət sayəsində tezliklə Zəngəzur dəhlizi açılacaq. Beləliklə, dəmir yolunda hökm sürən 35 illik ədalətsizlik sükut əbədi pozulacaq. Şərur şəhərində səhərin sakitliyində eşidilən qatarın səsi Kərim Əliyev kimi yüzlərlə sakinin xatirələrini yenidən canlandıracaq...
Bölmənin digər xəbərləri
