Bakı, 1 noyabr, AZƏRTAC

Oktyabr ayı ərzində Maliyyə Bazarlarına Nəzarət Palatasının (MBNP) 966 Çağrı mərkəzi vasitəsilə 3 mindən çox, elektron və kağız daşıyıcılarında 2021, sosial şəbəkələr üzərindən 180-dən çox müraciət cavablandırılıb.

Palatanın mətbuat xidmətindən AZƏRTAC-a bildirilib ki, informasiya agentlikləri, xəbər portalları, televiziya, radio və digər media kanalları vasitəsilə rəsmi və işçi qaydada daxil olmuş 40-dək sorğuya operativ şəkildə baxılıb. Ümumilikdə isə, palata tərəfindən oktyabrda 5200-dən çox müraciət icra olunub.

Maliyyə Bazarlarına Nəzarət Palatası səmərəli, effektiv və şəffaf kommunikasiyanın qurulması, palatanın fəaliyyətinə dair məlumatların ictimaiyyətə ötürülməsi işinin təkmilləşdirilməsi istiqamətində davamlı işlər həyata keçirir, müvafiq fəaliyyətin, keçirilmiş tədbirlərin kütləvi informasiya vasitələrində işıqlandırılması üçün press-relizlər təqdim edir, maliyyə bazarlarını təmsil edən bank, sığorta və kapital bazarları üzrə hesabatları açıqlayır, media nümayəndələrindən müxtəlif kommunikasiya vasitələri ilə daxil olmuş müraciətləri, sorğuları cavablandırır.

Oktyabrda ictimaiyyətə MBNP-nin öhdəliyindən irəli gələn məsələlərin icra statusu, təmsil olunduğu müxtəlif yerli və beynəlxalq tədbirləri, hesabatları və digər yenilikləri özündə əks etdirən 28 press-reliz açıqlanıb.

Qeyd edək ki, ictimaiyyətlə operativ kommunikasiyanın təmin edilməsi məqsədilə palatada bir neçə müraciət kanalı fəaliyyət göstərir. Bu müraciət kanallarına “www.fimsa.az” rəsmi internet səhifəmizdə aktiv olan “Bizə yazın” pəncərəsi, daimi olaraq müraciətlərin qəbulu və qeydiyyatı üçün yaradılan “[email protected]” elektron poçt ünvanı, müraciətlərin əyani qaydada təqdim olunması üçün palatanın inzibati binasında yerləşdirilmiş müraciət qutusu, 966 Çağrı mərkəzi, o cümlədən sosial şəbəkələri aiddir.

Palata fəaliyyəti barədə məlumatların daha böyük miqyasda və daha geniş auditoriyaya çatdırılması məqsədilə “Facebook”, “Youtube”, “Twitter”, “Linkedln” və “Instagram” kimi sosial media kanallarında aktiv təmsil olunur, rəsmi internet səhifə vasitəsilə ictimaiyyətə açıqlanan və palatanın fəaliyyəti ilə bağlı digər zəruri məlumatlar, mövcud olan vakansiyalar sosial şəbəkələrdə yerləşdirilir, bu kanallar vasitəsilə müraciətlərin operativ şəkildə cavablandırılması təmin edilir.

Oktyabrda sosial şəbəkələrdə ümumilikdə görülən işləri özündə əks etdirən 170-dən çox status və tvit paylaşılıb, palata ilə bağlı süjetlərin, müxtəlif proqram və verilişlərin, eləcə də maarifləndirici çarxların, animasiya filmlərinin paylaşıldığı “Youtube” kanalında 30-dək video yerləşdirilib.

Həmçinin ötən ay kommunikasiya sahəsində görülmüş işlərin tərkib hissəsi olaraq Maliyyə Bazarlarına Nəzarət Palatası və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən həyata keçirilən “Sığortalı gələcək” adlı təşviqat proqramının könüllülərinin iştirakı ilə qısa videoçarx hazırlanıb və sosial şəbəkələrdə yayımlanıb. Video insanların sığorta barədə məlumatlandırılması istiqamətində “Sığortalı gələcək” proqramının rolu, könüllülərin proqram çərçivəsində fəaliyyəti, gördükləri işləri və təəssüratlarını əhatə etməklə insanların sığortaya marağının artırılması məqsədi daşıyır.

Bunlarla yanaşı, MBNP tərəfindən ictimaiyyətin maliyyə xidmətləri sahəsində savadlılığının artırılması məqsədilə informativ broşürlar hazırlanıb, kreditin əldə edilməsi, bankda əmanət yerləşdirilməsi, sığorta, həmçinin zaminlik öhdəlikləri və zaminin hüquqları istiqamətində bir sıra zəruri informasiyanı əhatə edən sosial videoçarxlar hazırlanıb, aparıcı televiziya kanalları vasitəsilə, eləcə də vətəndaşlara xidmət sferasında fəaliyyət göstərən qurumların dəstəyi ilə geniş miqyasda yayımlanması təmin edilib.

Paralel olaraq, kütləvi informasiya vasitələri və ictimaiyyətlə əlaqələrin və kommunikasiyanın daha səmərəli və effektiv olmasını təmin etmək üçün palata tərəfindən müvafiq tədbirlər də təşkil olunur.