REGİONLAR
Ölkəmizdə həyata keçirilən sosial-iqtisadi islahatlar əhalinin rifahının daha da yaxşılaşdırılmasına yönəlib
Füzuli, 29 oktyabr, AZƏRTAC
Prezident İlham Əliyev tərəfindən əhalinin sosial müdafiəsinə və rifah halının yüksəldilməsinə yönəldilmiş qərarlar, həyata keçirilən sosialyönümlü tədbirlər Füzuli rayon sakinləri tərəfindən də böyük sevinc və minnətdarlıq hissi ilə qarşılanır. Həyata keçirilən sosial-iqtisadi islahatlar əhalinin rifahının daha da yaxşılaşdırılmasına xidmət edir. Bu sahədə imzalanmış hər bir sərəncam və fərman minlərlə füzulili məcburi köçkün ailəsinin sosial müdafiəsinin gücləndirilməsində əhəmiyyətli rol oynayıb.
AZƏRTAC-ın bölgə müxbiri xəbər verir ki, bu fikirlər Horadiz şəhərindəki Heydər Əliyev Mərkəzində Prezident İlham Əliyevin rəhbərliyi ilə respublikada həyata keçirilən sosial-iqtisadi islahatlara həsr olunan ümumrayon müşavirəsində səsləndirilib. Rayonun idarə, müəssisə və təşkilatlarının, hüquq-mühafizə orqanlarının rəhbərlərinin, icra nümayəndələri və bələdiyyə sədrlərinin, sadə vətəndaşların iştirak etdiyi müşavirədə çıxış edən rayon icra hakimiyyətinin başçısı Alı Alıyev xalqımızın ümummilli lideri Heydər Əliyevin layiqli davamçısı olan Prezident İlham Əliyevin uzaqgörən siyasəti, düşünülmüş islahatları və müdrik qərarları ilə Azərbaycanı dinamik inkişaf yoluna çıxardığını, ölkəmizin beynəlxalq miqyasda mövqelərinin daha da möhkəmləndiyini bildirib.
Diqqətə çatdırılıb ki, son bir il ərzində respublikanın müxtəlif şəhər və rayonlarında yeni inşa edilən şəhərciklərdə və qəsəbələrdə minlərlə füzulili məcburi köçkün mənzillə təmin edilib. Rayonun 100 min nəfərdən artıq əhalisinə yemək xərci müavinəti, habelə kommunal və digər xidmətlər üzrə 97 milyon manata yaxın vahid aylıq müavinət ödənilib. Dövlət ali təhsil müəssisələrinə ödənişli əsaslarla qəbul olunmuş füzulili məcburi köçkün gənclərin təhsil haqqı ödənişləri dövlət tərəfindən qarşılanıb. 54 min 115 min məcburi köçkünün pulsuz tibbi müayinəsi təşkil edilib. Səyyar “ASAN xidmət” avtobus və qatarları tərəfindən 5203 nəfər məcburi köçkünə müxtəlif istiqamətlər üzrə xidmətlər göstərilib. Rayon üzrə 159 aztəminatlı ailə özünüməşğulluq proqramına cəlb olunub, 432 ailəyə ünvanlı dövlət sosial yardımı təyin edilib. “DOST İŞ Mərkəzi” MMC vasitəsilə 350 nəfər haqqı ödənilən ictimai işlərə, 2000 min nəfərdən artıq rayon sakini isə mövsümü işlər olan pambıq, taxıl, şəkər çuğunduru becərilməsinə və ipəkqurdu saxlanılmasına cəlb olunaraq məşğulluqları təmin edilib.
Son bir ildə ərazidə yaşayan füzulili məcburi köçkünlərin elektrik enerjisindən istifadəyə görə əvvəlki illərdən yığılıb qalan 954 min manat borcu silinib. Dövlət başçısının şəhid vərəsələrinə birdəfəlik ödəmənin (11 min manat) verilməsi ilə bağlı Fərmanı Füzuli rayonundan olan 440 şəhidin 530 vərəsəsinə şamil olunub. “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Fərmanı ilə 2000-dən artıq füzulili məcburi köçkünün kreditlə bağlı narahatçılığına son qoyulub. Prezident İlham Əliyevin son bir ildə imzaladığı fərman və sərəncamlarla minimum əməkhaqqı 250 manata, pensiyalar isə 200 manata çatdırılıb. Bütün bunlar minlərlə füzulili məcburi köçkünün sosial rifah halının yaxşılaşdırılmasına, aztəminatlı ailələrin, müharibə veteranlarının, şəhid ailələrinin, pensiyaçıların, tələbələrin sosial müdafiəsinin gücləndirilməsinə xidmət edib.
Müşavirədə Füzuli rayonunda həyata keçirilən sosial-iqtisadi inkişafdan, tikinti-quruculuq işlərindən də bəhs olunub. Bildirilib ki, Horadiz şəhərinin içməli su və kanalizasiya sistemi yenidən qurulur, rayon ərazisində yaş baramanın qurutma məntəqəsinin, Dövlət Rəmzləri Muzeyinin, rayon mərkəzi xəstəxanasının, Arayatılı kəndində körpələr evi-uşaq bağçasının, “kərpic evlər” adlanan ərazidə məskunlaşmış 95 ailə üçün yeni qəsəbənin tikintisi davam etdirilir. Füzuli rayonu artıq 8 ildir ki, respublikada 100 min tondan artıq taxıl istehsal edən rayonlar sırasındadır. Son illərdə rayonda ənənəvi təsərrüfat sahələrindən olan pambıqçılıq və baramaçılıq inkişaf etdirilir. 2700 hektar ərazidə yaradılan aqropark yaxın vaxtlarda tam gücü ilə işə başlayacaq.
Alı Alıyev müşavirəyə məmur-vətəndaş münasibətlərindən də bəhs edib. Harada işləməsindən və tutduğu vəzifədən asılı olmayaraq bütün məmurların, dövlət işçilərinin, hüquq-mühafizə orqanlarının əhali üçün işləməli, insanlara xidmət etməli olduqlarını vurğulayıb. Prezident İlham Əliyevin, birinci xanım Mehriban Əliyevanın hər zaman vətəndaşlarla bir yerdə olduqlarını qeyd edərək, hər bir məmurun, vəzifəli şəxsin dövlətimizin başçısından və onun xanımından nümunə götürməyə çağırıb. Vurğulanıb ki, Prezident İlham Əliyevin həyata keçirdiyi daxili və xarici siyasətin ali məqsədini, ana xəttini Azərbaycanın daha inkişaf etmiş, qüdrətli dövlətə çevrilməsi, xalqımızın xoşbəxt və firavan yaşaması təşkil edir.