REGİONLAR
Ombudsmanın Cəlilabad Regional Mərkəzi Beynəlxalq İnsan Hüquqları Günü ilə əlaqədar regional videokonfrans keçirib
Cəlilabad, 11 dekabr, Bağır Əliyev, AZƏRTAC
Dekabrın 10-da Ombudsmanın Cəlilabad Regional Mərkəzi Beynəlxalq İnsan Hüquqları Günü ilə əlaqədar “Hər kəs doğulduğu andan bərabər və ayrılmaz hüquqlara və azadlıqlara malikdir” mövzusunda regional videokonfrans keçirib.
Videokonfransa Salyan, Neftçala, Biləsuvar, Cəlilabad, Masallı, Yardımlı, Lənkəran və Lerik rayon Heydər Əliyev mərkəzlərinin, Gənclər və İdman idarələrinin, Təhsil şöbələrinin və digər qurumların əməkdaşları qatılıblar.
AZƏRTAC-ın bölgə müxbiri xəbər verir ki, onlayn tədbirdə Ombudsmanın Cəlilabad Regional Mərkəzinin rəhbəri Ziya İsmayılov tədbir iştirakçılarını 10 dekabr - Beynəlxalq İnsan Hüquqları Günü münasibətilə təbrik edib.
O, çıxışında insan hüquqlarının yaranma tarixi və inkişaf mərhələləri, BMT-nin İnsan Hüquqları Ümumi Bəyannaməsi, İqtisadi, sosial və mədəni hüquqlar haqqında Beynəlxalq Pakt, mülki və siyasi hüquqlar haqqında Beynəlxalq Pakt, ölkəmizin bu mühüm sənədlərə qoşulması və digər müddəalar barədə geniş məlumat verib.
Qeyd olunub ki, ölkəmizdə insan hüquqları ilə bağlı islahatların təməli Azərbaycan Respublikasının yeni Konstitusiyasının qəbul edilməsi ilə qoyulub.
İnsan və vətəndaş hüquqlarının, azadlıqlarının təmin edilməsini dövlətin ali məqsədi kimi özündə təsbit edən əsas Qanunumuzun 48 maddədən ibarət üçüncü fəslinin bütün müddəaları insana, onun ləyaqətinə, hüquqlarına hörmət ruhunda yazılıb, insan hüquq və azadlıqları ən yüksək dəyər kimi təsbit edilib.
Ulu öndər Heydər Əliyevin müstəqil respublikamıza rəhbərlik etdiyi dövrlərdə ən çox diqqət yetirdiyi sahələrdən biri də insan hüquq və azadlıqlarının müdafiəsi və təmini olub. Qısa müddət ərzində bu məqsədlə bir sıra mühüm tədbirlər həyata keçirilib, çoxsaylı fərman və sərəncamlar imzalanmaqla müvafiq qanunvericilik aktları qəbul edilib.
Azərbaycan Respublikasında 1993-cü ildə ölüm hökmünün icrasına moratorium qoyulması və 1998-ci ilin fevral ayının 10-da isə tamamilə ləğv edilməsi də atılan mütərəqqi addımlardan oldu.
Ulu Öndərin “İnsan və vətəndaş hüquqlarının və azadlıqlarının təmin edilməsi sahəsində tədbirlər haqqında” 1998-ci il 22 fevral tarixli Fərmanı ilə insan hüquqlarının və azadlıqlarının təmin olunması istiqamətində ölkəmizdə mühüm tədbirlər həyata keçirilib.
Azərbaycan Respublikası Prezidentinin 1998-ci il 18 iyun tarixli Sərəncamı ilə “İnsan hüquqlarının müdafiəsinə dair Dövlət Proqramı” təsdiqləndi. Dövlət Proqramında insan hüquqları üzrə səlahiyyətli Müvəkkil təsisatının yaradılması, Azərbaycan Respublikasının insan hüquqları haqqında beynəlxalq sazişlərə qoşulması, bu sahədə elmi-tədqiqat institutunun yaradılması, normativ hüquqi aktların insan hüquqlarına dair beynəlxalq standartlara tam uyğunluğunun təmin edilməsi, hüquqi mexanizmlərin təkmilləşdirilməsi, insan hüquqları sahəsində fəaliyyət göstərən beynəlxalq qurumlarla əməkdaşlığın daha da inkişaf etdirilməsi, bu sahədə fəaliyyət göstərən beynəlxalq institut və qurumlarda tədqiqat və təhsil proqramları üzrə mütəxəssislərin hazırlanması, insan hüquqları haqqında öhdəliklərə riayət edilməsi və digər mühüm məsələlər nəzərdə tutulurdu.
İnsan hüquq və azadlıqlarının təmini istiqamətində aparılan hüquqi islahatların tərkib hissəsi kimi, insan hüquqlarının səmərəli müdafiəsinin təmin edilməsi məqsədilə 2001-ci il 28 dekabr tarixində “Azərbaycan Respublikasının İnsan Hüquqları üzrə Müvəkkili (ombudsman) haqqında” Konstitusiya Qanununun qəbul edilməsi vətəndaşların pozulmuş hüquqlarının bərpasında yeni mexanizmin və ölkə modelinin formalaşmasına imkan verdi.
Diqqətə çatdırılıb ki, hazırda Prezident İlham Əliyevin rəhbərliyi ilə mütərəqqi şəkildə ölkəmizdə aparılan hüquqi islahatların əsasında insan və vətəndaş hüquqları və azadlıqlarının təmin olunması dövlətin ali məqsədinə çevrilib.
Z.İsmayılov çıxışında, həmçinin Azərbaycanın ombudsman təsisatının insan hüquq və azadlıqlarının müdafiəsi və bərpası istiqamətində çox mühüm, qətiyyətli fəaliyyəti barədə geniş məlumat verib.
Videokonfransda Cəlilabad Dövlət Peşə Təhsil Mərkəzinin direktoru Etibar Sadıqov, Masallı rayon Heydər Əliyev Mərkəzinin əməkdaşı Gülcahan Vəkilzadə, Lerik rayon Heydər Əliyev Mərkəzinin direktoru Hüsaməddin Abbasov, Yardımlı rayon Heydər Əliyev Mərkəzinin direktoru Aqil Ağayev, Lənkəran Şəhər Təhsil Şöbəsinin məsul əməkdaşı Cəmil Axundzadə və başqaları mövzu ilə bağlı çıxış ediblər.