Bakı, 27 dekabr, AZƏRTAC

“OPEC plus” koalisiyasının neft istehsalını azaltması əbədi davam etməyəcək və sazişdən çıxmaq barədə qərar verilməlidir.

AZƏRTAC xəbər verir ki, bu barədə Rusiyanın Energetika naziri Aleksandr Novak “Rossiya 24” telekanalına müsahibəsində deyib.

Gələn ilin martınadək qüvvədə olacaq neft hasilatının azaldılmasını nəzərdə tutan sazişin gələcəyi ilə bağlı qeyri-müəyyənliyin davam etdiyi mühitdə rusiyalı nazir bildirib ki, “OPEC plus” üzrə istehsalın azaldılması nəticəsində neft bazarı sabitləşib. Lakin bu, əbədi davam edə bilməz: “Neft hasilatının azaldılması əbədi davam edə bilməz. Yavaş-yavaş razılaşmadan çıxmaq barədə qərar verməliyik”.

A.Novak bildirib ki, qlobal neft tələbatı gələn ilin yayında arta bilər.

Qeyd edək ki, dekabrın əvvəlində Vyanada Səudiyyə Ərəbistanı başda olmaqla OPEC-ə üzv 14 ölkə və Rusiyanın rəhbərlik etdiyi 10 qeyri-OPEC neft istehsal edən dövlət gündəlik hasilatın daha 500 min barrel azaldılması barədə qərar qəbul edib. Bu qərar çərçivəsində rəsmi Ər-Riyad neft istehsalını gündəlik 167 min barrel azaltmaqla “OPEC plus” formatında əməkdaşlığa dəstək olacaq. Lakin Səudiyyə Ərəbistanı 2020-ci ildən neft istehsalını könüllü olaraq sutkada daha 400 min barrel azaldacaq. Beləliklə də OPEC və OPEC-ə daxil olmayan ölkələr gələn ilin ilk 3 ayında gündəlik xam neft hasilatını ümumilikdə 2,1 milyon barrel azaldacaq.

Razılaşmaya görə, Rusiyanın istehsal etdiyi kondensat artıq xam neft istehsalı kvotasında hesablanmayacaq. Rusiya yeni qərara əsasən neft hasilatını gündəlik daha 70 min barrel azaldacaq. Beləliklə, Rusiya sutkalıq neft istehsalını ümumilikdə 300 min barrelə qədər azaldacaq.

Azərbaycan da hasilatın əlavə həcmlərdə azaldılması ilə bağlı yeni razılaşmaya qoşulub. Ölkəmiz müvafiq olaraq gündəlik neft hasilatını 20 min barreldən əlavə daha 7 min barrel azaldacaq. Beləliklə, öhdəliyi 27 min barrelə yüksələn Azərbaycan 2020-ci ilin yanvarından etibarən gündəlik hasilatı 769 min barrel həcmində saxlamalıdır. Ölkəmiz indiyədək gündəlik neft hasilatını 20 min barrel azaltmaqla bağlı öhdəliyini artıqlaması ilə yerinə yetirib.