OPEK NEFT HASİLATINI AZALDIR
AZƏRTAC-ın xüsusi müxbiri xəbər verir ki, sentyabrın 9-10-da Vyanada OPEK-in (Neft İxrac Edən Ölkələr Təşkilatı) üzvü olan 13 dövlətin nazirlərinin 149-cu iclası keçirilmişdir.
OPEK-in sədri, Əlcəzairin energetika və mədənlər naziri Şakib Xəlilin sədrliyi ilə keçən toplantıda üzv ölkələr son günlərdə beynəlxalq bazarlarda neftin qiymətinin düşməsini nəzərə alaraq, neft hasilatının qismən azaldılması barədə qərar qəbul etmişdir. Üzv ölkələr gündəlik hasilatı 532 min barrel azaldaraq, bir il əvvəl müəyyən olunmuş 28,8 milyon barrel həddində saxlamağı qərara almışdır. Neft hasilatı mümkün qədər tez, yaxın qırx gün ərzində azaldılacaqdır. Bu qərar İraq və İndoneziyaya şamil edilmir.
OPEK ölkələri hasilatın həcminin azaldılmasını son dövrlərdə dünyadakı iqtisadi tempin zəifləməsi və bunun nəticəsində də xam neftə tələbatın azalması ilə izah etmişlər. Mütəxəssislər OPEK-in növbəti iclasınadək neft hasilatında dəyişiklik olunmayacağını proqnozlaşdırsalar da, qəbul edilmiş qərar çoxları üçün gözlənilməz olmuşdur.
İclasda həmçinin 2009-cu il üçün OPEK-ə yeni sədr də seçilmişdir. Bu, Anqolanın neft sənayesi naziri Dezideriu da Qrasa Verissimu da Kostadır.
OPEK-in növbəti - 150-ci iclası dekabrın 17-də Əlcəzairin Oran şəhərində keçiriləcəkdir.
İndoneziya OPEK-də üzvlüyünü dayandırmışdır.
Bölmənin digər xəbərləri
