Ordubad, 26 dekabr, AZƏRTAC 

Ordubad şəhərindəki Tədbirlər meydanında növbəti “Ailə təsərrüfatı məhsulları” festivalı keçirilib. Festivala 50 ailə təsərrüfatından 5 mindən çox qablaşdırılmış məhsul çıxarılıb.

AZƏRTAC-ın Naxçıvan bürosu xəbər verir ki, tədbirdə əvvəlcə Ordubad rayonunda fəaliyyət göstərən ailə təsərrüfatları barədə məlumat verilib. Qeyd olunub ki, rayonda mövcud olan ailə təsərrüfatlarının, ümumilikdə, 3300 hektar payızlıq və yazlıq əkin sahəsi, 720 hektar meyvə bağı, 13 min 745 arı ailəsi və digərləri var. Onlar lizinq yolu ilə alınmış 138 müxtəlif təyinatlı maşın və mexanizmlərdən istifadə edirlər. Yaradılan şəraitdən bəhrələnən belə təsərrüfat sahibləri bu il 1685 hektar sahədən 4785 ton taxıl əldə ediblər. Bostançılar 42 hektardan 3020 sentner, tərəvəzçilər 676 hektardan 5755 ton, kartofçular 578 hektar sahədən 8538,5 ton, 721 hektar barverən bağlardan 5616,5 ton məhsul toplayıblar. Bu gün rayonda ailə təsərrüfatları, əsasən, heyvandarlıq, quşçuluq, arıçılıq, bağçılıq və əkinçilik sahələri üzrə fəaliyyət göstərir.

Festivalda iştirak edən ailə təsərrüfatı başçılarından Ələhi kənd sakini Yaşar Həbibov bu sahə üzrə daha çox fərqlənənlərdəndir. Bu zəhmət adamı ailə üzvləri ilə birgə pendir, şor, kərə, qaymaq, qatıq, qovurma, bal, araq, ekstrakt, baldırğan turşusu, müxtəlif mürəbbələr hazırlayaraq satışa çıxarır.

Vənənd kənd sakini Xaliq Mayılov isə daha çox şirniyyat məhsulları, ekstraktlar, meyvə quruları, mürəbbələr, kompotlar hazırlayır. Digər ailə təsərrüfatı başçısı Cəfər Nəsirov müxtəlif dərman bitkilərinin satışı ilə məşğul olur. Onun bu sahə üzrə səriştəliliyi təqdim etdiyi məhsullara böyük alıcı marağı qazandırıb. Kotam kəndindən olan ailə təsərrüfatçısı Nazim Həsənov isə festivala arıçılıq məhsulları, meyvə quruları, doşab və digər məhsullar çıxarıb.

Festivalda söhbət etdiyimiz rayon sakinlərindən Əli Qardaşov, Leyla Əliyeva, Salman Hüseynov və başqaları burada nümunəvi şərait yaradıldığını qeyd edərək, satışa çıxarılan məhsulların çoxçeşidliliyindən və keyfiyyətindən razılıq ediblər.

Festival zamanı müxtəlif iaşə xidməti də göstərilib, Ordubad Rayon Mədəniyyət Sarayının “Dübəndi” instrumental ansamblı rəngarəng musiqi proqramı ilə sakinlərə xoş ovqat bəxş edib.