İQTİSADİYYAT
Ötən ilin icmal büdcəsinin gəlirləri 21581,6 milyon manat, xərcləri isə 21406,0 milyon manat icra olunub
Bakı, 25 yanvar, AZƏRTAC
2016-cı il üzrə dövlət büdcəsinin mədaxili 16822,0 milyon manat proqnoza qarşı 17501,2 milyon manat və ya 104,0 faiz icra edilib.
Bu barədə AZƏRTAC-a Maliyyə Nazirliyindən bildirilib.
Qeyd edilib ki, Vergilər Nazirliyi tərəfindən mədaxil proqnozu 100,1 faiz icra edilməklə dövlət büdcəsinə 7015,2 milyon manat vəsait təmin edilib. Həmin vəsaitin 77,1 faizi və ya 5408,2 milyon manatı qeyri-neft sektorundan daxilolmaların payına düşür ki, bu da 2015-ci ilə nisbətən 379,8 milyon manat və ya 7,6 faiz çoxdur.
2016-cı il üzrə Dövlət Gömrük Komitəsi proqnoza 126,6 faiz əməl edərək dövlət büdcəsinə 2291,6 milyon manat vəsait təmin edilib ki, bu da 2015-ci illə müqayisədə 699,7 milyon manat və ya 44,0 faiz çoxdur.
Keçən il dövlət büdcəsindən maliyyələşdirilən təşkilatların ödənişli xidmətlərindən 239,1 milyon manat, maliyyə aktivlərinin yenidən qiymətləndirilməsindən 130,9 milyon manat, verilmiş kreditlərin qaytarılması və dövlət zəmanətləri üzrə 68,8 milyon manat, o cümlədən xarici kreditlər üzrə 54,2 milyon manat, cərimə və sanksiyaların tətbiqindən 40,4 milyon manat, sair daxilolmalardan 92,2 milyon manat vəsait dövlət büdcəsinə daxil olub.
Dövlət Neft Fondundan dövlət büdcəsinə 7615,0 milyon manat vəsait transfert edilib ki, bu da 2015-ci illə müqayisədə 515,0 milyon manat və 6,3 faiz azdır.
2016-cı ilin oktyabr-dekabr ayları üzrə dövlət büdcəsinin mədaxili 7398,1 milyon manat icra olunub. Ötən il dövlət büdcəsinin xərcləri 95,9 faiz və ya 17742,4 milyon manat icra edilib. 2016-cı ilin oktyabr-dekabr ayları üzrə dövlət büdcəsinin xərcləri 7120,2 milyon manat icra olunub.
İl ərzində dövlət büdcəsi xərclərinin 11693,0 milyon manatı və ya 65,9 faizi cari xərclərə, 4283,9 milyon manatı və ya 24,1 faizi əsaslı xərclərə, 1765,5 milyon manatı və ya 10,0 faizi dövlət borcuna və öhdəliklərinə xidmətlə bağlı xərclərə yönəldilib.
Dövlət büdcəsi xərclərinin 35,2 faizi və ya 6237,4 milyon manatı sosial təyinatlı xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib ki, bu da 2015-ci illə müqayisədə 571,5 milyon manat və ya 10,1 faiz çoxdur.
Büdcənin kəsiri 242,1 milyon manat təşkil edib.