CƏMİYYƏT
Özünütəcrid rejimi insanların həm gündəlik həyat tərzini dəyişdi, həm də onların psixoloji qeyri-sabitliyini üzə çıxardı
Bakı, 16 sentyabr, AZƏRTAC
Səhiyyə Nazirliyinin Psixi Sağlamlıq Mərkəzinin rəhbəri, tibb elmləri doktoru, professor Fuad İsmayılov onlayn müsahibə verərək, COVID-19 pandemiyasının insanların psixoloji sağlamlığına təsiri haqqında danışıb.
Bu barədə AZƏRTAC-a nazirliyin mətbuat xidmətindən bildirilib.
Psixi Sağlamlıq Mərkəzinin rəhbəri COVID-19 pandemiyasının insanların nəinki həyat və sağlamlığı üçün təhlükə yaratdığını, hətta hər kəsi olduqca çətin psixoloji vəziyyətə saldığını qeyd edib: “Özünütəcrid rejimi insanların həm gündəlik həyat tərzini dəyişdi, həm də onların psixoloji qeyri-sabitliyini üzə çıxardı”.
Fuad İsmayılov mərkəzə psixoloji yardım üçün müraciət edən insanların sayının artmaqda olduğunu və müraciət edən xəstələrdə müxtəlif psixoloji və psixiatrik pozuntular müşahidə olunduğunu vurğuladı: “Məsələn, kəskin stres reaksiyası və depressiya sindromlarından əziyyət çəkən xəstələr öz həyatlarını itirməkdən qorxur, özlərini “stres halında” saxlayır. Yoluxma qorxusu artdığına görə müraciət edənlərin arasında obsessiv-kompulsiv pozuntuların artması müşahidə olunur”.
Professor həmçinin panik ataklar və generalizə olunmuş təşviş pozuntuları, sosiallaşmanın az olması, ailədaxili münaqişələri, gələcəyin qarşısında qorxuları olan xəstələrdən danışıb: “Posttravmatik stres pozuntularını yaşayan xəstələrin sayı da az deyil. Bu xəstəlikləri ən kəskin şəkildə keçirənlər COVID-19-a yoluxmuş insanlar və yaxınlarıdır. 65 və yuxarı yaş qrupuna gəldikdə isə, onlarda da depressiya və tənhalıq hissi müşahidə olunub, çünki ciddi karantin rejimində özünü təcrid olunmuş hesab edib və yaxınları ilə görüşə bilməyib”.
Psixoloji sarsıntı keçirmiş ən böyük qrup isə həkimlər və tibb personalından ibarət olduğunu bildirən professor səhiyyə işçilərinin streslərə daha az davamlı olduqlarını vurğulayıb.
F.İsmayılov bildirib ki, Psixi Sağlamlıq Mərkəzində əhaliyə bütün pozuntularla bağlı ixtisaslaşmış ambulator müalicə: diaqnostik, psixiatrik, psixoloji və psixososial yardım göstərilir. Mərkəzin rəhbəri bu xidmətləri göstərmək üçün tibb müəssisəsində 4 müxtəlif profil üzrə iş aparan şöbələrin fəaliyyəti haqda danışıb: “Belə ki, Müalicə Konsultativ Şöbəsinin əsas funksiyası psixi xəstəliklərin diaqnostikası, müalicəsi və profilaktikasından ibarətdir. Bura həm üzvi mənşəli pozuntular, həm şizofreniya, həm şəxsiyyət pozuntuları ilə əlaqədar müraciətlər olunur. Təcili Psixoloji Yardım şöbəsinə psixoloji problemlər, kəskin stres reaksiyaları, depressiyalar, posttravmatik stress pozuntuları (PTSP), təşviş pozuntuları, obsessiv-kompulsiv pozuntuları olan insanlar müraciət edir. Psixososial Reabilitasiya şöbəsinin əsas iş profili psixi xəstəliklərdən əziyyət çəkən insanlara cəmiyyətdə sərbəst şəkildə fəaliyyət göstərməyə yardım etməkdən ibarətdir. Azərbaycanda ilk dəfə tətbiq edilən psixososial reabilitasiya prosesinin ən vacib məqamlardan biri də terapiyaların 3 dildə keçirilməsidir: Azərbaycan, rus və ingilis. Gündüz Stasionarı şöbəsinin isə əsas iş istiqaməti gecə-gündüz müşahidəyə və müalicəyə ehtiyacı olmayan, lakin gündüz stasionar şəraitə yaxın müalicə-diaqnostika köməyinə ehtiyacı olan psixi pozuntulu şəxslərə yardım etməyə yönəldilib”.
Psixi Sağlamlıq Mərkəzinin rəhbəri müsahibənin sonunda rəhbərlik etdiyi tibb ocağında xüsusi qaynar xəttin xidmət göstərdiyi haqda məlumat verib. Onun dediyi kimi, “İnam Telefonu” (012 566 50 61, 012 566 39 36) adlandırılan bu xidmət növü insanların həyatlarında çətinliklərə qalib gəlmək üçün ödənişsiz psixoloji yardım alması üçün yaradılıb. “Hər gün bu qaynar xəttə çoxlu sayda zənglər daxil olur və mütəxəssislər tərəfindən qəbul olunur. Müraciət etmiş insanlara psixoloji yardım göstərilir, onlara baş verənlərə başqa prizmadan baxmaq üçün yollar göstərilir və ümumi psixoloji dəstək təqdim olunur”, - deyə professor fikrini tamamlayıb.