DÜNYA
PAKİSTAN PREZİDENTİNİN BƏYANATI
Pakistan Prezidenti Pərviz Müşərrəf onun prezidentlik səlahiyyətinin daha 5 il müddətinə uzadılması məsələsinə dair aprelin 30-da keçiriləcək referendumun nəticələrindən asılı olmayaraq, ölkə silahlı qüvvələrinin ali baş komandanı vəzifəsində qalacaqdır. Bunu dövlət başçısı yerli televiziya ilə yayımlanmış mətbuat konfransında açıqlamışdır.
Prezident demişdir: “Mən referendum keçirildikdən sonra da ali baş komandan vəzifəsində qalacağam. Pakistan xalqının öz iradəsini ifadə etməsinin nəticələrinə əsasən, mən ölkənin milli mənafelərinə tam uyğun olan bir qərar qəbul edəcəyəm “.
Müşərrəfin dediyinə görə, ali dövlət vəzifəsində onun səlahiyyətinin müddətinin uzadılması Pakistanda siyasi və iqtisadi islahatların davam etdirilməsi üçün gərəkdir. Prezident həmçinin vurğulamışdır ki, bu vəzifədə o, Pakistanda islamçi radikal qruplaşmaların fəaliyyətinin məhdudlaşdırılması, o cümlədən onlardan bəzilərinin qadağan olunması üçün öz sələflərinin hər hansı birinə nisbətən daha çox iş görmüşdür.
Müşərrəf onu da bildirmişdir ki, qarşıdakı referendumun konstitusiyaya və demokratiyaya zidd olması barədə təməlçi Camaati- İslami Partiyasının ərizəsi ilə bağlı gələn həftə Ali Məhkəmənin çıxaracağı hər hansı qərara tabe olacaqdır.
İTAR-TASS-ın verdiyi xəbərə görə, Müşərrəfi beynəlxalq terrorizmlə mübarizədə özünə strateji tərəfdaş bilən ABŞ referendum keçirilməsini alqışlamış, amma anlatmışdır ki, Vaşinqton Pakistanın ali məhkəmə instansiyasının sorğunun qanuniliyi haqqında çıxaracağı qərarla razılaşacaqdır.