PAKİSTANDA ÜÇGÜNLÜK MATƏM BAŞLANMIŞDIR
Rəsmi məlumata görə, zəlzələ nəticəsində həlak olan 19 min adamın təxminən 17 min nəfəri Azad Kəşmirin payına düşür. Lakin zəlzələ qurbanlarının 50-55 min nəfərə çatacağı da proqnozlaşdırılır. Zəlzələdən zərər çəkmiş bölgələrdə gecə-gündüz xilasetmə işləri aparılır.
Pakistan ordusu iki gün ərzində tam səfərbərliyə alınmışdır. Hərbi qulluqçular daha çox zərər çəkən Kəşmirə göndərilir.
Təkcə oktyabrın 9-da gecə 500-dən çox ağır yaralı iri şəhərlərin hospitallarına gətirilmişdir. Pakistanın hakimiyyət orqanları yardım göstərilməsi xahişi ilə bir daha dünya birliyinə müraciət etmişdir.
Yeraltı təkanların doğurduğu sellər ölkənin şimalındakı dağlıq bölgəni mərkəzlə birləşdirən bir sıra nəqliyyat xətlərini, o cümlədən Çinə və Orta Asiya ölkələrinə aparan məşhur Qaraqorum şosesini iflic vəziyyətinə salmışdır. Dağılmış kənd və qəsəbələrə ancaq vertolyotla getmək mümkündür.
Hərbi qulluqçular və yerli sakinlərdən ibarət könüllü dəstələr dağlıq bölgələrdə dağıntıları və yolları təmizləyirlər. Beynəlxalq xilasedicilər Pakistan bölmələrinə qoşulurlar.
Oktyabrın 9-da gecə Pakistanda, o cümlədən İslamabadda bir neçə zəif yeraltı təkan qeydə alınmışdır. Hakimiyyət orqanları xəbərdarlıq edirlər ki, belə təkanlar, o cümlədən güclü təkanlar hələ bir neçə gün ərzində təkrarlana bilər.
Bölmənin digər xəbərləri
