Paris, 7 may ( AZƏRTAC ). Parisdəki “Hərbi məktəb”in iclas zalında ümummilli lider Heydər Əliyevin anadan olmasının 86-cı ildönümünə həsr edilmiş “Yeni dünya geosiyasətində Azərbaycanın rolu və yeri” mövzusunda kollokvium keçirmişdir.

Tədbiri Azərbaycanın Fransadakı səfirliyi Fransa Diplomatik və Strateji Araşdırmalar Mərkəzinin Keçmiş Dinləyicilər Assosasiyası (ACEDS), Milli Assambleyanın Fransa-Azərbaycan dostluq qrupu və “Atlantika-Ural” kolleci ilə birlikdə təşkil etmişdir.

ACEDS-in prezidenti Gi Korr ümumilikdə Qafqaz regionunun geostrategiyası, bölgədə yerləşən ölkələrin siyasi durumu, sərhədləri barədə məlumat vermiş, SSRİ-nin süqutundan sonra regionda baş vermiş hadisələrə, Ermənistan-Azərbaycan, Dağlıq Qarabağ, Gürcüstan, Cənubi Osetiya və Abxaziya münaqişələrinə toxunmuş, ərazilərimizin 20 faizinin Ermənistan tərəfindən işğal ediməsi faktını diqqətə çatdırmışdır. O, müstəqilliyini bərpa etdikdən sonra Azərbaycanın zəngin yeraltı və yerüstü sərvətlərinin əsl sahibi olmasından danışmışdır.

Səfir Tarik Əliyev bildirmişdir ki, xalqımızın ümummilli lideri Heydər Əliyev ölkəmizin Avropaya, beynəlxalq birliyə inteqrasiyasına xüsusi önəm vermiş, hazırki iqtisadi yüksəlişin bünövrəsini qoymuşdur. Məhz ulu öndərin dövründə ölkəmiz bir sıra beynəlxalq təşkilata, o cümlədən Avropa Şurasına üzv olmuşdur. Heydər Əliyev dünya miqyasında, regionda tarazlaşdırılmış siyasət yeritmiş və qonşu dövlətlərlə normal, ikitərəfli münasibətlərin qurulmasında böyük rol oynamışdır.

Fransa-Azərbaycan dostluq qrupunun rəhbəri Jan Lui Dümon iki ölkə arasında dostluq əlaqələrindən söz açaraq demişdir ki, müdrik dövlət xadimi Heydər Əliyev ən çətin və ağır vaxtlarda hakimiyyətə gəlmiş, ilk növbədə, sabitliyi bərpa etmiş, ölkənin iqtisadi yüksəlişinə nail olmaq üçün xarici sərmayədarları Azərbaycana dəvət etmişdir. 1993-cü ildə Prezident seçildikdən sonra ilk xarici səfərinə Fransadan başlamış, Fransanın keçmiş prezidenti ilə sıx dostluq münasibətləri yaratmış, ölkələrimiz arasında ikitərəfli əlaqələrin inkişafına xüsusi diqqət yetirmişdir. Ulu öndərin xarici siyasətini uğurla davam etdirən Prezident İlham Əliyev də ilk olaraq Fransaya səfər etmişdir. Bu səfərlər nəticəsində Fransa ilə Azərbaycan arasında siyasi, iqtisadi, mədəni sahələrdə əməkdaşlıq daha da inkişaf etmişdir.

Jan Lui Dümon ötən il Azərbaycana səfəri zamanı rəsmi şəxslərlə görüşlərini xatırlatmış, dostluq qruplarının möhkəm əlaqələrin yaranmasına və inkişafına töhfə verdiyini bildirmişdir.

Parisdəki Raxmaninov Konservatoriyasının direktoru qraf Pyer Şeremetyev tolerant ölkə kimi tanınan Azərbaycanda azsaylı xalqların dininə, dilinə, mədəniyyətinə göstərilən münasibəti təqdir etmişdir.

ACEDS-in baş katibi Yussef Şaker və “Atlantika-Ural” kollecinin sədri Olivye Vedrin beynəlxalq müşahidəçilər qrupunun tərkibində ötən il oktyabrın 15-də Azərbaycanda keçirilmiş prezident seçkilərini yaxından müşahidə etdiklərini söyləmişlər. Onlar seçicilərin əksəriyyətinin mütəşəkkil şəkildə İlham Əliyevə səs verməsinin, seçkilərin demokratik, şəffaf və beynəlxalq hüquq normalarına uyğun şəkildə keçirilməsinin şahidi olduqlarını vurğulayaraq, Azərbaycanın bir çox bölgələrinə səfərlərindən, zəngin mədəniyyətə malik xalqımızın qədim mədəni irsinə qayğısından, qonaqpərvərliyindən söz açmışlar.

“Total” şirkətinin nümayandəsi Alən Przibisz dünyanın tanınmış ictimai-siyasi xadimlərindən biri olan, təcrübəli dövlət başçısı Heydər Əliyevin müstəqillik qazanmış ölkəmizin iqtisadi inkişafına xüsusi əhəmiyyət verdiyini diqqətə çatdırmışdır. O demişdir ki, sürətli inkişafa nail olmaq üçün xarici investorları ölkəyə cəlb etmək məqsədilə Prezident Heydər Əliyevin şəxsi təşəbbüsü və rəhbərliyi altında 1994-cü ildə “Əsrin müqaviləsi” imzalanmışdır. Prezident Heydər Əliyev Fransanın məşhur “Total” şirkətini də bu müqaviləyə qoşulmağa dəvət etmişdir. “Total” şirkəti “Şahdəniz” və “Çıraq” neft yataqlarının istismarında yaxından iştirak etmiş və hazırda fəaliyyət göstərir.

ACEDS-in fəxri prezidenti, beynəlxlaq məsləhətçi Jan-İv Şevalye Azərbaycanın ərazisi, əhalisi barədə məlumat vermiş, Heydər Əliyevin bütün dövrlərdəki fəaliyyətindən ətraflı söhbət açmış, Ermənistan tərəfindən Naxçıvanın tamamilə blokada şəraitində yaşadığını, bu regiona gediş-gəliş üçün yeganə nəqliyyat vasitəsi kimi təyyarədən istifadə edildiyini bildirmişdir. O demişdir ki, ərazisinin 20 faizinin işğalına baxmayaraq gənc dövlət kimi Azərbaycan son beş ildə iqtisadi artımına görə dünyada lider ölkəyə çevrilmişdir.

Fransanın Azərbaycandakı ilk səfiri Jan Perrən Heydər Əliyevin görkəmli tarixi şəxsiyyət, uzaqgörən siyasi xadim olduğunu, xalqın işıqlı gələcəyi naminə yorulmadan çalışdığını söyləmişdir.

“Qaz de Frans” şirkətinin əməkdaşı Jan Filip Beriyon qlobal enerji təhlükəsizliyinin aradan qaldırılmasında qaz və neftlə zəngin Azərbaycanın mühüm rolundan danışmışdır.

Kollokviumda Parisdəki səfirlər, Xarici İşlər Nazirliyinin və akkreditə olunmuş diplomatik korpusun əməkdaşları, Fransa ictimaiyyətinin, işgüzar dairələrin, diasporumuzun təmsilçiləri, səfirliyimizin, ölkəmizin YUNESKO yanındakı daimi nümayəndəliyinin əməkdaşları və jurnalistlər iştirak etmişlər.

Əsgər Əliyev

AZƏRTAC-ın xüsusi müxbiri

Paris

######