Bakı, 12 iyun (AZƏRTAC). “PAŞA Bank” və “British Council” təşkilatı birgə keçirdikləri esse müsabiqəsinin qaliblərini mükafatlandırmışlar.

“PAŞA Bank”dan AZƏRTAC-a bildirmişlər ki, müsabiqənin məqsədi iqtisadi artım, islahatlar və inkişaf ilə bağlı məsələlərə nəzər salaraq gələcək inkişaf uğrunda həyata keçirilən proseslərdə gəncləri daha fəal iştiraka həvəsləndirməkdir.

Münsiflər heyəti 70-dən çox ərizə forması qəbul etmişdir. “British Council” təşkilatının Azərbaycan üzrə rəhbəri xanım Elizabet Vayt bütün yazıları şəxsən təhlil edəndən sonra qeyd etmişdir ki, Azərbaycanda belə yarışda ilk dəfə iştirak edir. Yazılan esselərdən çox təsirləndim. Bütün iştirakçılar müsabiqəyə böyük qayğı və diqqətlə yanaşmışlar. Bir çox yazılarda olduqca diqqəti cəlb edən tətbiqi və orijinal düşüncə tərzli məqamlar nümayiş olunmuşdur.

“PAŞA Bank”ın idarə heyətinin sədri Fərid Axundov qeyd etmişdir ki, bu yazılar mənə qətiyyətli, bacarıqlı, məqsədyönlü və ideyalarla dolu olan gənclərlə görüşməyə şərait yaratmışdır. Onların hər biri böyük ümidlər vəd edir. Mən bu namizədlərdə yaxın gələcəyin iqtisadiyyat və maliyyə sahələrinin mütəxəssislərini görürəm. Hər bir iştirakçıya uğurlar arzulayır və gələcək karyeralarının inkişafını görməyi arzulayıram.

Müsabiqə üç mərhələdən ibarət olmuşdur: ilkin mərhələ - yazı və bunun ardınca iki müsahibə mərhələsi. Müsabiqə iştirakçıları yüksək səviyyədə motivasiyalı, şəxsi və intellektual cəhətdən hazırlıqlı gənclər olmuşlar.

Yekun müsahibə üçün on nəfər namizəd seçilmişdir.

Müsahibə mərhələsi “PAŞA Bank” idarə heyətinin sədri Fərid Axundov, bankın ictimai əlaqələr və marketinq şöbəsinin əməkdaşları, həmçinin Elizabet Vayt tərəfindən aparılmışdır. Müsahibə mərhələsi başa çatdıqdan sonra münsiflər heyəti yekun qərara gəlmiş və qaliblər elan olunmuşdur.

Birinci yeri tutan namizədlər Böyük Britaniyanın paytaxtı Londonda yerləşən “King Kollec”də təşkil olunan biznes və menecmentlik üzrə yay kurslarında iştirak etmək hüququ qazanmışlar.

Bundan əlavə, fəxri birinci və ikinci yerin sahiblərinə mükafatlar və qiymətli hədiyyələr təqdim olunmuşdur.

Sonuncu müsahibə mərhələsinə keçən on nəfər namizədə isə “British Council” təşkilatı və “PAŞA Bank” tərəfindən sertifikatlar veriləcəkdir.