DÜNYA
PEKİN TAYVANA XƏBƏRDARLIQ EDİR
ÇXR Dövlət Şurası dəftərxanası rəisinin Tayvanın işləri üzrə müavini Van Tszaysi bildirmişdir ki, “belə addımlar müharibə başlanması təhlükəsini artırır”. O, nəzərə çarpdırmışdır ki, “Pekin Tayvan probleminin sülh yolu ilə həll olunmasına ümid bəsləyir, lakin ada müstəqilliyini rəsmən elan etsə, mütləq güc işlədəcəkdir”. Pekinin belə sərt mövqe tutmasına Tayvanın hakimiyyət orqanlarının konstitusiyaya dəyişikliklər etməyə və adanın statusu məsələsinə dair referendum üçün qanunvericilik əsası yaratmağa cəhd göstərməsi səbəb olmuşdur.
ÇXR Dövlət Şurasının dəftərxanası Çen Şuybyanı “separatçılıq siyasətini genişləndirməkdə” təqsirləndirmişdir. Dəftərxananın nümayəndəsi Taybeyin Vaşinqton tərəfindən havadarlığa ümid etməsini “çox sadəlövh və son dərəcə təhlükəli yanılma” adlandıraraq bildirmişdir ki, “amerikalılar yalnız öz milli mənafelərini qoruyur və Tayvanın müstəqilliyinə görə qan tökməyəcəklər”.