Perunun Baş naziri istefa verib
Bakı, 6 mart, AZƏRTAC
Perunun Baş naziri Alberto Otarola ötən həftə sonu ortaya çıxan səs yazılarına görə istefa vermək məcburiyyətində qalıb.
AZƏRTAC “El Pais” qəzetinə istinadla xəbər verir ki, səs yazısında Baş nazirin 25 yaşlı gənc qadına sevgisini etiraf etdiyi görünür.
Peru televiziyasının məlumatına görə, həmin qadın 2022-ci ilin dekabrında - Alberto Otarola müdafiə naziri işlədiyi dövrdə onun ofisində olub. İki aydan sonra qadın nazirlikdə işləmək təklifini rədd edib. Daha bir səs yazısında isə qadın Alberto Otarolanın onu təqib etdiyindən şikayətlənir.
Peru qanunvericiliyinə görə, Baş nazirin ardınca kabinetin digər 18 üzvü də istefa verməlidir.
Qeyd edək ki, Peru Nazirlər Kabinetində dəyişikliklər adi hala çevrilib. Ötən ay ölkə Prezidenti Dina Boluarte kabinetdəki dörd naziri dəyişib.
Dekabrın 7-də solçu prezident Pedro Kastilyonun həbsindən sonra Peruda iğtişaşlar başlayıb. Etirazçılar onun varisi Dina Boluartenin də istefasını tələb edirlər. Onlar, həmçinin parlamentin buraxılmasını və yeni seçkilər keçirilməsini istəyirlər.
Bölmənin digər xəbərləri
