Bakı, 12 sentyabr (AZƏRTAC). Sentyabrın 12-də Pirallahı Rayon İcra Hakimiyyətinin təşkilatçılığı ilə rayon müəllimlərinin 2012-2013-cü tədris ilinin yekunlarına və yeni tədris ilinin başlanmasına həsr edilmiş ilk toplantısı keçirilmişdir.

AZƏRTAC xəbər verir ki, Vaqif Mustafazadə adına Mədəniyyət Mərkəzində keçirilən tədbirdə Pirallahı Rayon İcra Hakimiyyəti başçısının müavini Vəzir Səfixanov ulu öndər Heydər Əliyevin əsasını qoyduğu siyasi və iqtisadi kursun, bütün sahələri əhatə edən islahatların Prezident İlham Əliyev tərəfindən uğurla davam etdirilməsi nəticəsində son illər Azərbaycanın dünyada ən qabaqcıl ölkələr sırasına çıxdığını vurğulamış, müstəqillik yolunda inamla addımlayan respublikamızın inkişafında təhsilin önəmli yerlərdən birini tutduğunu söyləmişdir. Bildirmişdir ki, ötən tədris ilindəki nailiyyətlərdən danışarkən ilk növbədə 168 nömrəli məktəbi qeyd etmək lazımdır. 2012/2013-cü tədris ilində ali təhsil müəssisələrinə məktəbin 36 məzunu qəbul olunmuşdur. Çilov adasında fəaliyyət göstərən 131 nömrəli məktəb də yaxşı nəticə göstərmişdir.

Natiq növbəti illərdə gənclərin hərbi təhsil verən məktəblərə istiqamətləndirilməsi işində irəliləyiş əldə ediləcəyinə, eləcə də "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində təhsil almaq üçün xaricə göndərilən tələbələrin arasında Pirallahı rayonunun təmsilçilərinin olacağına ümid ifadə etmişdir.

Sonra çıxış edənlər Ümummilli Liderin təhsillə bağlı siyasətinin Prezident İlham Əliyev tərəfindən uğurla davam etdirilməsindən danışmış, Azərbaycanın birinci xanımı, UNESCO və İSESCO-nun xoşməramlı səfiri, Milli Məclisin deputatı Mehriban Əliyevanın rəhbərliyi ilə Heydər Əliyev Fondunun ölkə təhsilinin maddi-texniki bazasının daha da möhkəmləndirilməsi, gənc nəslin hərtərəfli tərbiyəsi, gənclərin sağlam həyat tərzinin formalaşdırılması istiqamətində fəaliyyətini vurğulamışlar. Pirallahı Rayon İcra Hakimiyyətinin rayonda təhsilin inkişafına göstərdiyi diqqət və qayğı xüsusi qeyd edilmişdir.

Çıxışlardan sonra artıq tələbə adı qazanmış 6 nəfərə fəxri fərman və mükafatlar təqdim edilmişdir. 168 nömrəli orta məktəbin pedaqoji kollektivinin 7 nəfər üzvü, eləcə də digər məktəblərin fərqlənən müəllimlərinin əməyi də fəxri fərmanlarla qeyd olunmuşdur.

Tədbirə yekun vuran V.Səfixanov Prezident İlham Əliyevin 2004-cü il 21 avqust tarixli Fərmanına əsasən qeyd edilən 15 sentyabr - “Bilik günü” münasibətilə toplantı iştirakçılarını təbrik etmiş, təhsilimizin inkişafı, xalqımızın işıqlı gələcəyinin təmin olunması işində hər bir kəsə uğurlar arzulamışdır.