Bakı, 24 noyabr, AZƏRTAC

Azərbaycan millisinin və “Vyetnamın ”Duk Qianq” klubunun voleybolçusu Polina Rəhimova AZƏRTAC-ın suallarına cavablandırıb. Həmin müsahibəni təqdim edirik.

- Əvvəlcə sizi “Duk Qianq” komandasının heyətində Vyetnam çempionatının gümüş medallarını qazanmağınız münasibətilə təbrik edirəm. Bununla bağlı təəssüratlarınızı bilmək maraqlı olardı…

- Təbriklərə görə çox sağ olun. Təəssüf ki, final oyununda qələbə qazana bilmədik. Halbuki matça yaxşı başladıq və ilk setdə qalib gəldik. Növbəti üç setdə isə uduzaraq ikinci yerlə kifayətlənməli olduq. Komandamızda bir qədər inamsızlıq oldu. Xəbərdarlıq etmişdim ki, bir oyunçu ilə uzağa gedə bilmərik. Komanda şəklində oynamalıydıq. Təəssüratlara gəlincə, bir az məyusam. Finalda qalib gəlsəydik, əla olardı. Çünki klubumuzun sponsorunun 60 yaşı tamam olub. Yubiley münasibətilə ona qızıl medalları hədiyyə etmək istəyirdik. Amma alınmadı. Daha çox işləmək və ciddi dəyişikliklər etmək lazımdır ki, komanda inkişaf etsin. Artıq dördüncü ildir finalda uduzuruq. Bunu düzəltmək üçün hansısa dəyişikliklər etməliyik.

- Komandanız finalda uduzsa da, siz liqanın ən yaxşı hücumçusu seçildiniz. Bu barədə nə deyə bilərsiniz?

- İkinci dəfə bu ada layiq görülürəm. Ötən il də bu mükafatı almışam. Əlbəttə, xoş oldu. Çünki səni qiymətləndirirlər, kimin ən yaxşı oyunçu olduğunu və daha yaxşı hücum etdiyini görürlər. Bu, mənim üçün əlavə üstünlükdür. Yenidən Vyetnamda oynamağa qərar versəm, daha yüksək məvacib tələb edə bilərəm. Artıq bilirlər ki, mən stabil oyunçuyam, ardıcıl iki il liqanın ən yaxşı hücumçusu seçilmişəm. Hesab edirəm ki, bu, müqavilə şərtlərini yaxşılaşdırmaq üçün də yaxşı vasitədir. Tək Azərbaycanda deyil, digər ölkələrdə də özümə dəyər verildiyini görmək məni sevindirir.

- Vyetnam çempionatının ümumi səviyyəsi necədir? Liqanı Azərbaycan çempionatından fərqləndirən əsas amillər nədir?

- Çempionatın ümumi səviyyəsi zəifdir. Ölkə kimi, voleybol da hələ inkişaf mərhələsindədir. Səviyyənin artması üçün bəlkə də 20 il vaxt lazımdır. Burada müsbət məqamlar da var. Məsələn, sən öz tarixini yaza, orada voleybolun inkişafına kömək edə bilərsən. Bu cür motivasiya mənim xoşuma gəlir. İkinci dəfə Vyetnamda oynadım. Ona görə yox ki, burada mövsüm qısa olur. Həm də dediyim kimi, burada öz tarixini yaza bilərsən. Məsələn, öz məsləhətlərinlə komandanın taktiki planda inkişafına töhfə vermək olar. Azərbaycanda isə voleybolun səviyyəsi daha yüksəkdir. Bizim vaxtımızda yüksək nəticələr əldə etdik. Həmin vaxt “Azərreyl”, “Azəryol”, “Rabitə” və “Lokomotiv” kimi iddialı klublar var idi. Vyetnamda hazırda bu cür komandalar yoxdur. İnkişaf üçün onlara vaxt vermək lazımdır.

- Ölkəyə tam uyğunlaşa bilmisiniz?

- Ölkəyə tam olaraq adaptasiya olduğumu deyə bilmərəm. Çünki Vyetnam fərqli mədəniyyəti, dili, iqlimi və mətbəxi olan ölkədir. Hər dəfə başqa ölkəyə gedəndə oraya uyğunlaşmağa çalışırsan. Hətta bu, hər hansı Avropa ölkəsi olsa belə. Amma fərqli ölkələri və mədəniyyətləri tanımaq mənə xoş gəlir. Ona görə də karyeramı davam etdirmək üçün bu cür ölkələri seçirəm. Bilirsiniz ki, dünyanın müxtəlif ölkələrində çıxış etmişəm. Hansısa ölkəyə uyğunlaşmaq üçün mənə adətən 2 həftə lazım olur.

- Vyetnam mətbəxindən ən çox sevdiyiniz yemək hansıdır?

- Burada “Fo bo” adlanan yemək var. Toyuqlu əriştə supudur. Çox dadlı olur. Həmçinin “Ban mi” deyilən sendviçi qeyd edərdim. Vyetnamın tarixinə baxsanız, görərsiniz ki, bu ölkə uzun illər Fransanın müstəmləkəsi olub. Fransızlar burada müxtəlif sahələrdə irs qoyub gediblər. Yerli əhali onlardan bulka və digər un məmulatlarını bişirməyi öyrənib. Fransızlar ölkəni tərk etdikdən sonra isə vyetnamlılar həmin bulkalardan istifadə etməklə çox dadlı sendviçlər hazırlamağa başladılar. Tərkibində müxtəlif souslar və ət məhsulları olur. Vyetnam mətbəxindən “Bum ça” adlı yeməyi də sevirəm. İçkilərdən isə şaftalılı jelatin çayıni bəyənirəm. Çox qeyri-adi içkidir. Sanki soyuq çay içirsən, digər tərəfdən də içərisində olan jelatin hissəciklərini çeynəyə bilirsən. Həmçinin onların qəhvəsi çox xoşuma gəlir. Özləri buna “Egg cofee” (Yumurta qəhvəsi) deyirlər. Tərkibində süd olmur. Çünki orada hava çox isti olduğundan süd dərhal çürüyür. Onun əvəzinə yumurtadan hazırlanmış kremdən istifadə edirlər.

- Bu ölkədə oynadığınız müddətdə sizi ən çox təəccübləndirən nə oldu?

- Məni ən çox təəccübləndirən ölkənin heyvanlar aləmi və təbiəti oldu. Çempionat oyunları zamanı müxtəlif yerləri gəzirdik. Qəhvə, qoz-fındıq bağları, gözəl çaylar göz oxşayır. Ekskursiya zamanı gördüyüm mənzərələrdən zövq alırdım. Qaldığımız hotelin yaxınlığında çoxlu kərtənkələ, bəzən bizi qorxudan böyük uçan çəyirtkələr var idi. Həmçinin başqa bir hoteldə nəhəng qırxayaq görmüşdüm. Belə şeylərə öyrəşmədiyimiz üçün tez-tez bizi qorxudurdular. Amma hər ölkənin bir özəlliyi olur. Bu da Vyetnamın özünəməxsusluğudur. Yerli əhali buna alışdığından onlara hər şey adi gəlir. Mənim üçün isə qəribə idi. Vyetnamlılar çox rahat insanlardır. Təbii ki, bu, ölkənin inkişafına mənfi təsir edir. Daha məsuliyyətli olsaydılar, istənilən işə daha ciddi yanaşsaydılar, həm yaşayış səviyyələri, həm də ölkə voleybolu daha yaxşı səviyyədə olardı.

- Son zamanlar Azərbaycan voleybolunda canlanma müşahidə olunur. Bu canlanmaya hansısa formada töhfə verməyi düşünürsünüz?

- Bəli, haqlısınız. Azərbaycan voleybolunda canlanma var. Düşünürəm ki, voleybolun inkişafı üçün daha bir şans verilib. Amma unutmaq olmaz ki, artıq bizim nəsil voleybolla vidalaşmağa hazırlaşır. Heyəti gəncləşdirmək lazımdır. Ölkədə ucaboy və yerli qızlar yığmaya cəlb edilməli, milli komanda yenidən formalaşdırılmalıdır. Bizdə bu cür qızlar var. Onlarda voleybola maraq oyatmaq, bunun necə əla idman növü olduğunu başa salmaq, gəncləri inkişaf etdirmək və yeni milli komanda yaratmaq lazımdır.