Politoloq : “Azərbaycan” məhəlləsinin açılışı ikitərəfli münasibətləri simvolizə edən mühüm addımdır
Bakı, 21 iyun, AZƏRTAC
Türkiyə-Azərbaycan strateji tərəfdaşlığı regionun geosiyasi arxitekturasını müəyyən edən əsas dayaqlardan biridir. “Bir millət – iki dövlət” anlayışı ilə möhkəm əsaslara sahib olan bu əməkdaşlıq konkret sahələr üzrə praktiki və dərin inteqrasiya prosesini də özündə təcəssüm etdirir. Məhz bu nöqteyi-nəzərdən yanaşdıqda, iyunun 19-da Türkiyənin Kahramanmaraş şəhərində Azərbaycanın maliyyə dəstəyi və təşəbbüsü ilə inşa edilən 1323 mənzildən ibarət “Azərbaycan” məhəlləsinin açılışının yalnız humanitar yardım aktı deyil, həmçinin Türkiyə-Azərbaycan münasibətlərində yeni strateji mərhələnin də aydın təzahürü olduğunu ifadə edə bilərik.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, Prezident İlham Əliyevin açılış mərasimində şəxsən iştirak etməsi bu layihənin iki qardaş dövlət arasındakı əlaqələrin dərinliyi və gələcək inkişaf perspektivləri baxımından nə qədər önəmli olduğunu bir daha təsdiq etmiş oldu: “Tarix, dil, mədəniyyət və dini amillərlə biri-birinə sıx bağlı olan bu iki dövlət arasında əlaqələr xüsusilə İkinci Qarabağ müharibəsindən sonra yeni məzmun və güc qazandı. İlkin olaraq onu qeyd etmək lazımdır ki, 44 günlük Vətən müharibəsində Türkiyənin Azərbaycanın yanında olması və qeyd-şərtsiz dəstəyini ifadə etməsi, eləcə də “əsrin fəlakətini” yaşayan qardaş Türkiyənin ən çətin anında Azərbaycan dövlətinin və xalqının bütün gücü ilə səfərbər olması iki ölkənin strateji əməkdaşlığının əbədi sütunlarla möhkəmləndiyinin bariz nümunəsidir. Türkiyə və Azərbaycan bölgədə sabitlik və təhlükəsizliyin qorunması istiqamətində vahid mövqedən çıxış edən iki dost və qardaş ölkədir. Onların birgə addımları bir çox regional və qlobal güclərin təsir dairəsində tarazlıq yaratmaqla yanaşı, milli maraqların qorunmasında da əvəzsiz rol oynayır. Beləliklə də, Kahramanmaraşdakı layihə zəlzələnin dağıdıcı təsirlərinə qarşı birgə əməkdaşlıq və humanitar dəstək nümunəsi olmaqla paralel olaraq regional inteqrasiya və koordinasiyanın inkişafına təkan verən mühüm addımdır. Həmçinin bu layihə gələcəkdə Türk Dövlətləri Təşkilatı və digər regional platformalarda daha geniş əməkdaşlıq layihələrinin icrasına da zəmin yaradır. Məhəllənin infrastrukturu, təhsil və sosial obyektləri bölgədə yeni həyatın bərpasına təkan verir, eləcə də qardaş xalqların gələcəkdə birgə inkişaf perspektivlərini gücləndirir”.
Politoloq əlavə edib ki, Kahramanmaraşda “Azərbaycan” məhəlləsinin açılışı birmənalı şəkildə ikitərəfli münasibətlərin humanitaryönümlü, strateji və çoxşaxəli tərəfini simvolizə edən mühüm addımdır. Bu təşəbbüs həm də Türk dünyasında inteqrasiyanın güclənməsi, qarşılıqlı dəstək və həmrəylik ənənələrinin davam etdirilməsi üçün nümunədir. Belə sosial və humanitar layihələr regional sabitliyin və davamlı inkişafın təminatçısına çevrilməklə yanaşı, Azərbaycan diplomatiyasının strateji inkişaf xəttini və gələcəyə yönəlik Azərbaycan-Türkiyə birliyini möhkəmləndirir.
Bölmənin digər xəbərləri
