Bakı, 17 mart, AZƏRTAC

AMEA-nın Rəyasət Heyəti aparatında Azərbaycan Respublikası Nazirlər Kabinetinin “Dövlət mülkiyyətində olan və ya dövlət mülkiyyəti hesabına yaradılan tədqiqat infrastrukturunun avadanlığından tədqiqatçıların istifadəsinə görə ödənilən xidmət haqlarının təsdiq edilməsi” və Nazirlər Kabinetinin 2019-cu il 1 avqust tarixli 340 nömrəli Qərarı ilə təsdiq edilmiş “Ölkədə mövcud olan qabaqcıl texnoloji avadanlıqla təchiz edilmiş elmi-tədqiqat mərkəzlərinin və laboratoriyaların (tədqiqat infrastrukturunun) reyestrinin tərtib olunması və aparılması Qaydası”nda dəyişiklik edilməsi barədə Qərarı” ilə bağlı müzakirələr aparılıb.

Bu barədə AZƏRTAC-a AMEA-dan məlumat verilib.

Müzakirələrdə AMEA-nın prezidenti vəzifəsini icra edən akademik Arif Həşimov, Nazirlər Kabinetinin Elm, mədəniyyət, xalq təhsili və sosial problemlər şöbəsinin sektor müdiri Elxan Bağırzadə, İqtisadiyyat Nazirliyinin Sahibkarlığın inkişafı siyasəti və tənzimlənməsi şöbəsinin müdiri Anar Hacızadə, Maliyyə Nazirliyinin Vergi siyasəti və gəlirlər şöbəsinin Vergi olmayan gəlirlər sektorunun aparıcı məsləhətçisi Ağa Namazov, Ədliyyə Nazirliyinin Qanunvericilik Baş İdarəsinin baş məsləhətçisi Aygün Şahbanova, Təhsil Nazirliyinin Elm, ali və orta ixtisas təhsili şöbəsinin böyük məsləhətçisi Nüşabə Məmmədbəyova və Kənd Təsərrüfatı Nazirliyinin Aqrar İnnovasiya Mərkəzinin Elmi innovasiyaların tədqiqi şöbəsinin müdiri Cavanşir Təlai iştirak ediblər.

AMEA prezidentinin köməkçisi Arzu Əlizadə bildirib ki, qeyd olunan qərarlarda tədqiqat infrastrukturundan tədqiqatçıların istifadəsi ilə bağlı xidmət haqları müəyyən edilmədiyindən Nazirlər Kabinetinin 2020-ci il 19 iyun tarixli 7951/5421 nömrəli dərkənarı ilə AMEA-ya qeyd olunan məsələ ilə bağlı müvafiq normativ sənədin layihəsinin hazırlanması tapşırılıb. Bununla bağlı Kənd Təsərrüfatı və Təhsil nazirliklərinin, həmçinin AMEA-nın tabeliyində olan tədqiqat infrastrukturunun siyahısı və onların hər biri üzrə xidmətin təklif olunan tarif norması müəyyən edilib.

Görüşdə İqtisadiyyat, Maliyyə, Ədliyyə, Kənd Təsərrüfatı və Təhsil nazirliklərinin nümayəndələri tarif norması ilə bağlı layihəyə münasibət bildiriblər. Onların təkliflərinə uyğun olaraq, layihədə müəyyən dəyişikliklər edilib. Qərara alınıb ki, bu dəyişikliklər də nəzərə alınmaqla layihə yekun redaksiyada son qərarın verilməsi üçün yaxın günlərdə müvafiq dövlət strukturlarına göndərilsin.