İQTİSADİYYAT
Qafqaz regionunda bir sıra əhəmiyyətli layihələr həyata keçirmiş “AS Group İnvestment” şirkəti ən qabaqcıl ``texnologiya və mükəmməl təcrübəyə malikdir
Bakı, 15 yanvar (AZƏRTAC ). Bu gün tikinti sektoru respublikamızın sürətlə inkişaf edən sahələrindəndir. Təsadüfi deyildir ki, son illər Azərbaycanda fəaliyyət göstərən inşaat şirkətlərinin həyata keçirdikləri tikinti işlərinin həcmində və keyfiyyətində də artım müşahidə edilmişdir.
Həmin qurumlardan biri də ölkədə və xaricdə mühüm infrastruktur layihələri icra edən “AS Group İnvestment” şirkətidir.
Şirkətin biznesin inkişafı və marketinq departamentinin rəhbəri Elçin Niyazov AZƏRTAC-a müsahibəsində qurumun fəaliyyəti barədə ətraflı məlumat vermişdir.
- Elçin müəllim, “AS Group İnvestment” şirkəti əsasən hansı sahələrdə fəaliyyət göstərir?
- Əsası 2003-cü ildə qoyulan “AS Group İnvestment” şirkəti artıq 10 ildir ki, Azərbaycanın tikinti sənayesi sektorunda çalışır. Fəaliyyətinə beton və beton məhsullarının istehsalı ilə başlayan şirkət qısa müddətdə istehsalat sahəsini genişləndirərək istehsal etdiyi məhsulların cərgəsinə armokarkas və dəmir-beton məhsullarını əlavə etmişdir. Bu qurum güclü texniki-material baza yaratmış, tezliklə tikinti şirkəti kimi fəaliyyətə başlamış və bir sıra dövlət və kommersiya layihələrini uğurla tamamlayaraq ölkənin aparıcı tikinti müəssisələrindən birinə çevrilmişdir.
2013-cü ildə “AS Group İnvestment” “AS İnşaat”, “AS Tikinti”, “AS Georgia” və “AS Stroy” şirkətlərini tərkibində birləşdirib developer şirkətinə çevrilmişdir. Şirkətin hazırkı fəaliyyəti isə tikinti materiallarının istehsalından başlayaraq tikinti obyektinin tam hazır vəziyyətdə təhvil verilməsinə qədər prosesi əhatə edir.
-Bu müddət ərzində respublikada və ya xaricdə həyata keçirdiyiniz layihələrlə bağlı məlumat verməyiniz yaxşı olardı...
-Şirkət bütün Qafqaz regionunda bir sıra əhəmiyyətli layihələr həyata keçirərək tikinti işlərinin aparılmasında ən qabaqcıl texnologiya və mükəmməl təcrübəyə malikdir.
Artıq tamamlanmış layihələrə qaçqın və məcburi köçkünlər üçün nəzərdə tutulmuş bir sıra yaşayış məhəllələrini, Dövlət Gömrük Komitəsinin inzibati binasını, Hövsan qəsəbəsində Olimpiya İdman Kompleksini, Sumqayıt şəhərində alüminium zavodunun elektroliz emalatxanasını, Bakıda Səməd Vurğun küçəsində yeraltı keçidi, Yevlax şəhərində Dəri emalı zavodunu və digər dövlət və kommersiya layihələrinin icrasını misal göstərmək olar.
Hazırda “AS Group İnvestment” “BESIX Group” ilə birgə Azərbaycan Respublikası Dövlət Neft Fondunun binasının tikintisini həyata keçirir. Bununla yanaşı, şirkətimiz Azərbaycan Milli Bankının inşasını reallaşdırmaq üçün elan olunan tenderdə iştirak edir.
-Ölkədə inşaat işləri aparan şirkətlər az deyil. “AS Group İnvestment” onlardan hansı keyfiyyətlərinə görə seçilir?
-Təbii ki, ilk növbədə peşəkar işçi heyəti və görülən işə məsuliyyətli münasibəti ilə. Şirkətimiz ən qabaqcıl texnologiyadan istifadə, həmçinin iddialı məqsədləri ilə sənaye sektorunda böyük etibar qazanmışdır.
- Şirkətin kadr potensialı və mütəxəssis hazırlığı sizi qane edirmi?
-Kollektivimizdə yüksək ixtisaslı mütəxəssislər çalışırlar.
Təsadüfi deyildir ki, tikinti prosesində istifadə olunan inşaat materiallarının istehsalından tutmuş iri layihələrin təhvil verilməsinədək bütün proseslər kadrlarımız tərəfindən uğurla idarə olunur və həyata keçirilir.
- İnşaat işlərində hansı nou-xau və ya qabaqcıl texnologiyalar tətbiq olunur?
- Şirkətimiz tərəfindən həyata keçirilən layihələrin inşasında ən son tikinti texnologiyalarından olan tunel qəlibdən istifadə edilir. Yüksək keyfiyyətli tikinti materialı hesab olunan tunel qəlib 9 bal gücündə zəlzələyə davamlıdır, eyni zamanda, tikintinin sürətlə həyata keçirilməsini təmin edir. Bundan əlavə, binaların tikintisində səs, termo və hidroizolyasiya sistemlərindən istifadə olunur ki, bu da mənzillərdə enerjiyə 30 faizədək qənaət etməyə imkan verir.
- Bir sıra xarici ölkələrdə bina tikintisində alternativ enerji mənbələrindən istifadəyə geniş yer verilir. Şirkətin mühəndis və memarları bu istiqamətdə hansı işləri görürlər?
-Azərbaycanda həyata keçiriləcək “Hövsan” layihəsində ekoloji təmiz nəqliyyat vasitəsinin istifadəsi nəzərdə tutulmuşdur. Aparılan araşdırmalardan məlum olmuşdur ki, Hövsan ərazisində həm günəş, həm də külək enerjisindən istifadə üçün əlverişli şərait vardır.
- “AS Group İnvestment” şirkəti “yaşıl bina” prinsipi ilə tikilən binaların layihəsi ilə məşğul olurmu?
- Şübhəsiz, binaların layihələndirilməsində “Yaşıl bina” prinsipi nəzərə alınır və bu da enerji şirkətlərindən asılılığın müəyyən qədər azaldılması, insanların sağlamlığı, ətraf mühitin qorunması anlamına gəlir. Diqqət yetirilən digər məsələlərdən biri də binaların şimal-cənub istiqamətlərində yerləşdirilməsi, istilik itkisinə yol verilməməsi üçün binaların xaricdən izolyasiya edilməsidir.
- Sizcə, tikintidə xarici, yoxsa yerli materiallardan istifadə etmək məqsədəuyğundur?
- Tikintidə əsasən şirkətimiz tərəfindən istehsal olunan inşaat materiallarından istifadə olunur, mobilizasiya və sənayeləşmə işləri aparılır. Ehtiyac olduğu təqdirdə istər yerli, istərsə də Türkiyə və ya Avropa istehsalı olan tikinti materiallarından istifadə edilir. Hər bir halda tikinti üçün ən yüksək keyfiyyətli materiallara müraciət olunur.
- Bəzən mühüm obyektlərin layihəsi və onun icrası xarici şirkət və mütəxəssislərə həvalə olunur. Halbuki respublikamızda tanınmış, istedadlı memarlar az deyil…
- Bu fikirlə tamamilə razıyam. Yerli mütəxəssislərin istedadı və peşəkarlığı heç də xarici kadrlardan geri qalmır. İstər xaricdə, istərsə də Azərbaycanda həyata keçirdiyimiz layihələrdə memar heyətini əsasən yerli kadrlardan ibarət komanda təşkil edir.
- Sizcə, regionlarda şəhərsalma zamanı əsas diqqət hansı məsələlərə yönəlməlidir?
- Regionlarda şəhərsalma zamanı insanların rahatlığını və təhlükəsizliyini təmin etmək üçün bütün zəruri amillərə diqqət yetirilməlidir. Layihələndirmə zamanı ilk növbədə əhalinin sıxlığı, sakinlərin təminat məsələləri, infrastruktur, nəqliyyat, işıq, qaz, su, kanalizasiya sistemləri, ətraf mühit və s. mütləq qaydada nəzərə alınmalıdır.