QARƏTÇİLƏR YAXALANMIŞDIR
Daxili İşlər Nazirliyinin mətbuat xidmətindən AZƏRTAC-a verilən məlumata görə, noyabrın 9-na keçən gecə Ağstafa rayonunun Dağ Kəsəmən kənd sakinləri Mahmud Vəliyevə məxsus mağazadan 10,1 milyon manat dəyərində danışıq kartları, tütün məmulatı, Qabil Nəcəfova məxsus mağazadan isə 3.700.000 manat dəyərində danışıq kartları və tütün məmulatı oğurlanmışdır. Mütəşəkkil Cinayətkarlıqla Mübarizə Baş İdarəsi, Cinayət Axtarışı Baş İdarəsi və Ağstafa Rayon Polis Şöbəsi əməkdaşlarının birgə keçirdiyi əməliyyat-axtarış tədbiri nəticəsində həmin cinayətləri törətmiş Tərtər rayon sakini Cəmil Ağayev və Bakı şəhərində müvəqqəti məskunlaşmış Zəngilan rayon sakini, əvvəllər məhkum olunmuş Arzuman Rzayev yaxalanmışlar. Törədilmiş hadisələrin digər iştirakçısı Mayıl İsmayılovun yaxalanması istiqamətində əməliyyat-axtarış tədbirləri davam etdirilir.
Bölmənin digər xəbərləri
