QATİL TUTULMUŞDUR

15.05.2006 [21:24]
Çap et
A⁺ A^-

Daxili İşlər Nazirliyinin mətbuat xidmətindən AZƏRTAC-a verilən məlumata görə, Yeni Suraxanı qəsəbəsində yaşayan Dostəli Abuzərov Salyan rayon sakini Qüdrət Malıyevin idarə etdiyi “VAZ-2106” markalı avtomaşını saxlayıb, onu Abşeron rayonunun Goradil kəndində yaşayan qohumu Balakişi Begiyevin evinə aparmasını tələb etmişdir.

Sərxoş D.Abuzərovun əlində 2 ədəd tüfəng olduğunu görən Q.Malıyev bu tələbi rədd etmişdir. Bununla əlaqədar baş vermiş münaqişə zəminində D.Abuzərov tüfəngdən atəş açıb Q.Malıyevi qətlə yetirmiş, meyiti həyətində gizlədərək, avtomaşında arvadının Goradil kəndində yaşayan babası B.Begiyevin evinə getmişdir. D.Abuzərov tüfəngləri B.Begiyevə vermiş və orada olan arvadının evə qayıtmasını tələb etmişdir. D.Abuzərov evinə qayıdarkən 2-ci Zabrat qəsəbəsinin ərazisində avtomaşını maneəyə vuraraq, yararsız hala salmış və qəsəbədə yaşayan xalasının evində gizlənmişdir.

Suraxanı və Sabunçu rayon polis idarələri əməkdaşlarının birgə keçirdikləri profilaktik tədbirlərdən sonra D.Abuzərov təslim olmuşdur.

2 ov tüfəngi B.Begiyevin evindən götürülmüşdür.