REGİONLAR
Qax Günərzi Qayğı Mərkəzində tərbiyə alan uşaqlara məktəb ləvazimatları hədiyyə olunub
Mərkəzdə tərbiyə alan və bu il ilk dəfə məktəbə gedəcək uşaqların yola salınmasına həsr olunan tədbirdə rayon icra hakimiyyətinin, müvafiq idarə və təşkilatların nümayəndələri, valideynlər iştirak edib.
AZƏRTAC xəbər verir ki, tədbir iştirakçıları əvvəlcə mərkəzdə tərbiyə alan uşaqların əl işləri və rəsm əsərlərindən ibarət sərgi ilə tanış olublar.
Uşaqların ifasında Azərbaycanın dövlət himni səsləndirilib.
Tədbiri Qax Günərzi Qayğı Mərkəzinin rəhbəri Səfiyə Süleymanova açaraq, mərkəzin fəaliyyəti və əldə olunan nailiyyətlər barədə məlumat verib. Diqqətə çatdırılıb ki, “İnkişaf Naminə İdman” İctimai Birliyinin nəzdində fəaliyyət göstərən Qax Günərzi Qayğı Mərkəzi Prezident İlham Əliyevin “Sağlamlıq imkanları məhdud uşaqlara və sosial təhlükəli vəziyyətdə olan yetkinlik yaşına çatmayanlara sosial xidmət göstərilməsi sahəsində əlavə tədbirlər haqqında” 2013-cü il 9 yanvar tarixli Sərəncamına əsasən, Əmək və Əhalinin Sosial Müdafiəsi Nazirliyi tərəfindən həyata keçirilən layihə çərçivəsində yaradılıb. Mərkəzdə risk qrupuna daxil olan, valideynləri işləyən, eləcə də aztəminatlı ailələrin məktəbəqədər və məktəbyaşlı uşaqlarının ahəngdar inkişafını və tərbiyəsini təmin etmək üçün müxtəlif təlimlər həyata keçirilir.
Bildirilib ki, mərkəz 3-12 yaş arasında 30 uşağa xidmət göstərir. Onlardan 4-ü əlillik dərəcəsi olan uşaqlardır.
Uşaq Paralimpiya Komitəsi idarə heyətinin üzvü, “İnkişaf Naminə İdman” İctimai Birliyinin məsul işçisi Vəli Musayev vurğulayıb ki, Günərzi Qayğı Mərkəzinin yaradılmasından əsas məqsəd uşaqların inkişafına, onların asudə vaxtlarının səmərəli keçirilməsinə, yerli icma səviyyəsində sosial uyğunlaşma və inteqrasiya hüquqlarının təmin edilməsinə, yaşayış səviyyəsi aşağı olan ailələrə və uşaqlara dəstək verməkdir. Belə mərkəzlərdə uşaqların qavrayış, emosional və fiziki inkişafına, əlilliyi olan uşaqların təhsil hüquqlarının reallaşmasına, uşaqlarda özünəxidmət və ünsiyyət üzrə praktiki məişət vərdişlərinin inkişafına yardım göstərilir.
Rayon icra hakimiyyəti başçısının müavini Vəfa Heydərova ölkəmizdə əhalinin aztəminatlı təbəqəsinə, o cümlədən sağlamlıq imkanları məhdud uşaqlara və əlilliyi olan insanlara göstərilən dövlət qayğısından bəhs edib, uşaqlara müvəffəqiyyətlər arzulayıb.
Uşaqların hazırladığı konsert proqramı tədbir iştirakçıları tərəfindən maraqla qarşılanıb, onlara həvəsləndirici mükafatlar təqdim olunub.