Qaxda Kitab bayramı keçirilib
Qax, 19 may, Mustafa Dadaşov, AZƏRTAC
Bilik mənbəyi olan kitab xalqın milli sərvətidir. Bu sərvətin qorunub saxlanmasında, nəsildən-nəslə çatdırılmasında, cəmiyyətin intellektual və mənəvi potensialının artırılmasında kitabxanalar əvəzsiz rol oynayır. Azərbaycan qədim dövrlərdən başlayaraq yüksək kitab mədəniyyəti ilə seçilib, zəngin kitabxanaları ilə tanınıb.
AZƏRTAC-ın bölgə müxbiri xəbər verir ki, bu fikirlər “Konstitusiya və Suverenlik İli” çərçivəsində Qax rayon C.Cabbarlı adına Mərkəzi Kitabxananın təşkilatçılığı ilə mayın 19-da keçirilən “Konstitusiyaya sədaqət, kitaba hörmət” adlı Kitab bayramında səsləndirilib.
Əvvəlcə bayramın keçirildiyi rayon Mədəniyyət Mərkəzinin foyesində təşkil edilən “Heydər Əliyev-102”, “Zərifə Əliyeva”, “Konstitusiya və Suverenlik İli”, “Qərbi Azərbaycan bizim tarixi torpağımızdır”, “Əsrləri aşan kitablar”, “Suverenliyə yol açan gənclik”, “Mədəni irsimiz”, “Qaxlı yazarlar” və digər mövzularda kitab sərgiləri ilə tanışlıq olub.
Tədbirin əvvəlində Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib.
Rayon icra hakimiyyəti başçısının müavini Vəfa Heydərova, Şəki-Zaqatala Regional Mədəniyyət İdarəsinin Qax rayonu üzrə nümayəndəsi Dilarə Əzizova, rayon Mərkəzləşdirilmiş Kitabxana Sisteminin direktoru Güllü Əhmədova və başqaları çıxış edərək, bilik mənbəyi olan kitabın geniş təbliğ olunmasında belə tədbirlərin əhəmiyyətini vurğulayıblar. Bildirilib ki, kitablar kainatın sirlərini özündə əks etdirən sonsuz məlumat mənbəyi, bütün elmlərin açarını özündə gizləyən sirli bir xəzinədir.
Kitab bayramı rayon Mədəniyyət Mərkəzinin və İncəsənət Məktəbinin hazırladığı konsert proqramı ilə davam edib.
Bölmənin digər xəbərləri
