Qazaxda arpa biçininə start verilib
Tovuz, 18 iyun, AZƏRTAC
Bu ilin məhsulu üçün Qazax rayonunda payızlıq və yazlıq olmaqla, 11732,8 hektar sahədə taxıl əkilib ki, bunun da 6950 hektarı arpa, 4782,8 hektarı isə buğda sahəsidir.
AZƏRTAC-ın bölgə müxbirinin məlumatına görə, Qazax rayonunda artıq arpa biçininə start verilib. Aqrotexniki tədbirlər vaxtında və keyfiyyətlə həyata keçirilib. Biçinin mütəşəkkil təşkili və optimal müddətdə başa çatdırılması, təhlükəsizlik tədbirləri ilə bağlı hazırlıq işləri görülüb, texnikalar saz vəziyyətə gətirilib.
Hazırda rayonun Yuxarı Salahlı, Orta Salahlı, Aşağı Salahlı, Daş Salahlı kəndlərində dəmyə sahəsində əkilmiş arpa biçininə başlanılıb.
Bu günə kimi 6950 hektar arpa sahəsinin 70 hektarında biçin aparılıb. Sahələrdən 223 ton məhsul toplanıb. Orta məhsuldarlıq isə 31,9 sentner təşkil edir. Biçinlə əlaqədar sahələrə 7 ədəd kombayn cəlb edilib.
Müxbir -Ruslan Novruzoğlu
Bölmənin digər xəbərləri
