Qazi ananın şəhid oğlu VİDEO
Gəncə, 22 oktyabr, Elcan Məmmədov, AZƏRTAC
Xocalı hadisələrindən sonra məndə düşmənə qarşı daha böyük nifrət yarandı və 1992-ci ildə döyüşlərdə iştirak etmək üçün könüllü yazıldım. Bir çox hücum bölmələrində olmuşam. Qəlpə yarası almışam. Hazırda da bədənimdə qəlpələr var. Düşünürəm ki, oğlum şəhid Rəşad Ələkbərovun vətənpərvər yetişməsində bu yaşadıqlarımın da böyük rolu olub.
Bunu AZƏRTAC-ın bölgə müxbirinə şəhid Rəşad Ələkbərovun anası, Birinci Qarabağ müharibəsinin iştirakçısı Nailə Ələkbərova deyib.
Ələkbərov Rəşad İlqar oğlu 1997-ci il sentyabrın 15-də Gəncədə anadan olub. 2012-ci ildə Gəncə şəhər 44 nömrəli məktəb-liseyin 9-cu sinfini bitirib. 2012-2014-cü illərdə 3 saylı peşə məktəbinin Mühasibatlıq fakültəsini uğurla başa vurub. 2016-cı ildə Səfərbərlik və Hərbi Xidmətə Çağırış üzrə Dövlət Xidmətinin Gəncə Şəhər Kəpəz Rayon Şöbəsindən həqiqi hərbi xidmətə çağırılıb, Müdafiə Nazirliyinin “N” saylı hərbi hissəsində xidmət edib. Hərbi xidmətdən əvvəl və sonra videooperator işləyib.
Rəşad 2020-ci ilin iyul ayında - Tovuz hadisələrindən sonra Səfərbərlik və Hərbi Xidmətə Çağırış üzrə Dövlət Xidmətinin Gəncə Şəhər Kəpəz Rayon Şöbəsinə gedərək, düşmənə qarşı döyüşmək üçün könüllü müraciət edib. Sentyabrın 27-də başlayan Vətən müharibəsində isə ön cəbhədə düşmənə qan uddurub. Nailə ana Rəşadın Füzulidən Şuşaya qədər döyüş yolu keçdiyini deyir: “Hərdən bir zəng edirdi, danışırdıq. Həmişə deyirdi ki, “narahat olma, Qələbə bizimlədir”. Müharibənin qanlı üzünü gördüyüm üçün, ana kimi çox narahat idim. Sonuncu dəfə noyabrın 7-si danışdıq. Ayın 9-u isə Rəşad şəhid oldu”.
O, Vətən müharibəsi zamanı Xocavənd rayonunun Hadrut qəsəbəsi, Füzuli rayonu, Şuşa şəhərinin Daşaltı kəndi istiqamətindəki döyüşlərdə qəhrəmanlıqla vuruşub, bu ərazilərin işğaldan azad edilməsində fədakarlıq göstərib. Noyabrın 9-da Şuşa-Laçın yolunda gedən döyüşlərdə qəhrəmancasına şəhid olub. Noyabrın 12-də Gəncə şəhərinin Şəhidlər xiyabanında dəfn edilib.
Ələkbərov Rəşad İlqar oğlu Prezident İlham Əliyevin müvafiq sərəncamları ilə ölümündən sonra “Vətən uğrunda”, “Cəsur döyüşçü” və “Şuşanın azad olunmasına görə” medalları ilə təltif olunub.
Bölmənin digər xəbərləri
