MƏDƏNİYYƏT
Qəbələdə keçiriləcək Üçüncü Beynəlxalq Musiqi festivalı haqqında informasiya Rusiya Mədəniyyət Nazirliyinin saytında yerləşdirilmişdir
Moskva, 21 iyul (AZƏRTAC). Bu il iyulun 30-dan avqustun 5-dək Qəbələdə keçiriləcək Üçüncü Beynəlxalq Musiqi Festivalı haqqında informasiya Rusiya Federasiyasının Mədəniyyət Nazirliyinin rəsmi saytında yerləşdirilmişdir. Festivalın təsisçisi Heydər Əliyev Fondu, bədii rəhbər Dmitri Yablonskidir (ABŞ).
Məlumatda qeyd edilir ki, 2009-cu ildə dünya musiqi aləmində əlamətdar bir hadisə baş vermişdir. Azərbaycanın kurort şəhəri Qəbələdə Beynəlxalq Musiqi Festivalı açılmışdır. Bu gün belə bir ümumi meyl getdikcə daha çox təsdiqlənir ki, iri şəhərlər festival paytaxtları statusunu tədricən itirir, bu status mənzərəli kiçik yerlərə - sənət gözəlliyi ilə təbiət gözəlliyinin çox uğurlu şəkildə uzlaşdığı məkanlara keçir. 2009-cu ildə Azərbaycanın mənzərəli Qəbələ şəhərində yaranmış Beynəlxalq Musiqi Festivalı buna əyani sübutdur.
Azərbaycanın ən qədim şəhərlərindən biri olan Qəbələ çoxəsrlik tarixə malikdir. Eramızdan əvvəl III əsrdən - bizim eranın V əsrinə qədər Qafqaz Albaniyasının paytaxtı olmuş Qəbələ regionun ən mühüm siyasi, iqtisadi və ticarət mərkəzi idi.
Bu gün Qəbələni çox vaxt Azərbaycanın İsveçrəsi adlandırırlar. Lakin fikrimizcə, Qəbələni “cənnət guşəsi” adlandırmaq daha düzgün olardı. Doğrudan da buranın gözəl təbiəti, fantastik mənzərələri adamı heyran edir. Sıx meşəli, bol sulu dağ çayları ilə diqqəti cəlb edən Qəbələyə valeh olmamaq mümkün deyildir. Bu yerlərin təbiəti qeyri-adi dərəcədə müxtəlifdir: yamyaşıl dağlar, çağlayan şəlalələr, güzgü kimi göllər, yabanı bitən şabalıd ağacları...
Elə bu səbəbdən Heydər Əliyev Fondunun seçdiyi bu məkan “musiqiçilərin illik toplantısı” sayılan bu mühüm beynəlxalq musiqi bayramının təşkil edilməsi üçün çox münasibdir. Qəbələ festivallarının keçirildiyi günlərdə klassik musiqi həvəskarları ABŞ, Rusiya, İngiltərə, Fransa, İtaliya və digər ölkələrin tanınmış musiqiçilərinin ifasında ölməz əsərlər dinləmək imkanı əldə edirlər.
Əvvəlki forumların iştirakçıları arasında “Raanana-simfonett orkestra” (İsrail), London Kral Filarmonik orkestri, Oksana Yavlonskaya (BMT yanında Beynəlxalq İncəsənət Akademiyasının fəxri akademiki, Culian Musiqi Akademiyasının professoru, ABŞ), Üzeyir Hacıbəyli adına Azərbaycan Dövlət Simfonik orkestri, Boris Berezovski (Rusiya, fortepiano), Vyaçeslav Voynarovski (Rusiya, tenor)... Bu siyahını davam etmək olar.
Bundan əlavə, həmin musiqi forumları keçirilən dövrdə gənc musiqiçilər məxsusi təşkil olunmuş ustad dərslərində iştirak etmək imkanı qazanırlar.
YUNESKO-nun baş direktoru İrina Bokova Qəbələ Beynəlxalq Musiqi festivalının əhəmiyyətini qeyd edərək vurğulamışdır ki, bu bayram Azərbaycanın musiqi ruhunu əks etdirir. O demişdir: “Bu diyarda müxtəlif mədəniyyətlər qovuşur və bu festival həmin mədəniyyətləri ən yüksək səviyyədə təmsil edəcəkdir”.
“Novosti kulturı” telekanalı 2009-cu ildə bildirirdi ki, Qəbələ musiqi festivalının bədii rəhbəri Dmitri Yablonski birinci festivalı açaraq demişdir: “Hamı deyir ki, bura İsveçrə kimi gözəldir, amma mən istərdim ki, desinlər - bura Azərbaycan kimi gözəldir. “Bizim” Alp dağlarında hara baxsan, balaca kəndlər görərsən, burada isə təbiət öz əzəli gözəlliyini qoruyub saxlamışdır. Buna görə də mən istərdim ki, bütün dünyada olan musiqiçi dostlarım buraya gəlib gözəl musiqi ifa etsinlər”.
2011-ci ildə keçiriləcək festivalda müğənnilər Anna Samuil, Massimilino Pisapia (tenor, İtaliya), Kral “Kovent Qarden” opera teatrının (London) solisti, RF Xalq Artisti, SSRİ Dövlət Mükafatı laureatı Sergey Leyferkus, Oydun İversen (bariton, Norveç) və Liina Yonso (soprano, Norveç), dirijorlar Yuri Başmet (“Novaya Rossiya” orkestri), Klaudio Vandelli (İtaliya), Rauf Abdullayev, Terye Mikkelsen (Norveç), Dmitri Yablonski. Solist instrumentalistlər Alyona Bayeva (skripka), Denis Matsuyev (fortepiano), Boris Berezovski (fortepiano), Sergey Krılov (skripka), Şlomo Mints (skripka) iştirak edəcəklər. Bundan əlavə, məşhur “Terem-kvarted” və “Jak Lüsyenin triosu” kollektivləri də festivalda çıxış edəcəklər.
Asya Hacızadə
AZƏRTAC-ın xüsusi müxbiri
Moskva