Qəbələ, 29 oktyabr (AZƏRTAC). Cari ilin 9 ayı ərzində Qəbələ rayonunun sosial-iqtisadi inkişafı istiqamətində görülmüş işlər və qarşıda duran vəzifələr müzakirə edilmişdir.

AZƏRTAC xəbər verir ki, bununla bağlı oktyabrın 28-də keçirilən hesabat yığıncağında rayon icra hakimiyyətinin başçısı Səbuhi Abdullayev qeyd etmişdir ki, ötən müddət ərzində iqtisadiyyatın ayrı-ayrı sahələri üzrə 192183 min manatlıq məhsul istehsal edilmişdir. Bu, keçən ilin müvafiq dövrünə nisbətən 76258 min manat, yaxud 66 faiz çoxdur. Cari ilin doqquz ayında ötən ilin müvafiq dövrünə nisbətən ümumi məhsul buraxılışı sənayedə 2165 min manat, yaxud 17 faiz, kənd təsərrüfatında 1688 min manat, yaxud 4 faiz, tikintidə 70340 min manat, yaxud 2,7 dəfə, nəqliyyatda 231 min manat, yaxud 12 faiz, rabitədə 37 min manat, yaxud 7 faiz, ticarətdə 1790 min manat, yaxud 10 faiz artmışdır. Əvvəlki ilin 9 ayı ilə müqayisədə əsas kapitala yönəlmiş investisiyanın həcmi 2,7 dəfə artmışdır.

Natiq vurğulamışdır ki, Qəbələ şəhərində inşa edilən Olimpiya İdman Kompleksinin, Qarabağ müharibəsi əlilləri və şəhid ailələri üçün 36 mənzilli yaşayış binasının, rayon icra hakimiyyətinin yeni inzibati binasının, “Qafqaz Sport” otelinin, Fövqəladə Hallar Nazirliyinin N saylı hərbi hissəsinin, sərinləşdirici su və limonad istehsalı müəssisəsinin, Heydər Əliyev Fondunun sifarişi ilə Nic qəsəbəsində 420 şagird yerlik tam orta məktəbin, Qəbələ Beynəlxalq Hava Limanının, İmamlı kəndində 80 şagird yerlik məktəb binasının tikintisi başa çatdırılmışdır. Həmçinin Qəbələ Mədəniyyət Mərkəzinin, Qəbələ Atçılıq Mərkəzinin, Qəbələ şəhər məscidinin, Qəbələ Futbol Akademiyasının Stadionlar Kompleksinin, “Yengicə” istisu müalicə və sağlamlıq kompleksinin yeni korpusunun, Topbağ kəndində 80 şagird yerlik ümumi orta məktəb binasının, Milli Təhlükəsizlik Nazirliyinin Qəbələ rayon şöbəsi üçün yeni inzibati binanın, Qəbələ şəhərinin sel sularından mühafizəsi üçün beton bəndin, Qəbələ şəhəri-Hava limanı birinci dərəcəli avtomobil yolunun, Nic qəsəbəsində 3 nömrəli məktəb üçün 360 şagird yerlik binanın tikintisi, Qəbələ şəhərinin su təchizatı və kanalizasiya sisteminin yenidən qurulması işləri sürətlə davam etdirilir.

Yığıncaqda idarə və təşkilat rəhbərləri görülmüş işlər barədə məruzə etmişlər. Çıxışlarda qarşıda duran vəzifələrdən bəhs edilmiş, cari ildə görüləcək işlər müzakirə olunmuş, təkliflər dinlənilmiş və qərar qəbul edilmişdir.