QƏRBİ GÜRCÜSTANDA GÜCLÜ QASIRĞA
İmereti bölgəsində (Qərbi Gürcüstan) tüğyan edən güclü qasırğa şəhər və kəndlərdə həyatı tamamilə iflic halına salmışdır. Poti, Kutaisi və Xobi şəhərləri təbii fəlakətdən daha çox zərər cəkmişlər. Burada məktəblər və bir sıra idarələr müvəqqəti olaraq bağlanmışdır. Qasırğanın vurduğu ziyanın dəyərini müəyyənləşdirmək hələlik mümkün deyildir. İTAR-TASS-ın müxbirinin aldığı məlumata əsasən, ilkin hesablamalara görə təkcə Potiyə 5 milyon lari (2,3 milyon dollar) həddində ziyan dəymişdir. İnsan tələfatı yoxdur.
Poti şəhərində qasırğa evlərin damlarını uçurmuş, ağacları kökündən qoparmışdır. Bir çox xırda ticarət köşkləri dağıdılmış, elektrik xətləri və su təchizatı sistemləri sıradan çıxmışdır. Sinoptiklərin vaxında xəbərdarlıq etməsi sayəsində gəmilərin zədələnməsinin qarşısını almaq mümkün olmuş, onlar limandan açıq dənizə çıxarılmışlar.
Kutaisidə təbii fəlakətdən beş nəfər zərər çəkmişdir. Onların üçü başından ağır yaralanmış və şəhər xəstəxanasının reanimasiya şöbəsinə qoyulmuşdur.
Bölmənin digər xəbərləri
