Azərbaycan Prezidenti İlham Əliyev iyulun 12-də Maştağa qəsəbəsində sakinlərlə görüşdü. Qəsəbənin mərkəzinə toplaşmış minlərlə sakin dövlətimizin başçısını hərarətlə salamladılar, ona hörmət və ehtiramlarını ən səmimi sözlərlə ifadə etdilər.

Rayon ağsaqqalı, qəsəbənin qazısı Hacı Əsədulla dövlətimizin başçısının gəlişini yüksək qiymətləndirərək, ona Allah-Təaladan uzun ömür, cansağlığı arzuladı və Prezidentə Qurani-Kərim bağışladı.

Prezident İlham Əliyev ağsaqqallarla, sakinlərlə səmimiyyətlə görüşərək, göstərdikləri münasibətə görə təşəkkürünü bildirdi.

Maştağalılar ümummilli liderimiz, müstəqil Azərbaycanın memarı və qurucusu Heydər Əliyevin ölkəmiz və xalqımız qarşısındakı tarixi xidmətlərini məmnunluqla xatırlayaraq dedilər ki, ulu öndərimiz həmişə Maştağaya xüsusi diqqət və qayğı göstərmişdir. Siz də onun siyasi xəttini layiqincə davam etdirir, qəsəbəmizə böyük diqqət göstərirsiniz. Yollarımız, məktəblərimiz təmir olunur. Hamımız Sizə minnətdarlığımızı bildiririk. İstəyirik, xanımınızla birlikdə bizim məktəblərə gələsiniz. Biz Prezident İlham Əliyevin ətrafında sıx birləşərək, onun daxili və xarici siyasətini bundan sonra da dəstəkləyəcəyik.

Bəzi sakinlər respublikamızın rəhbərinə yaxınlaşaraq problemlərindən söz açdılar.

Prezident İLHAM ƏLİYEV onları narahat edən problemlərin araşdırılıb həll ediləcəyini bildirərək dedi:

- Siz narahat olmayın, bütün məktublara baxılır, bütün ərizə və şikayətlərə baxılır və bütün tədbirlər görülür. Mən olduğum bütün yerlərdə - rayonlarda, qəsəbələrdə, kəndlərdə məktubları yığıram, şikayətlərə baxıram və bu məsələlər operativ qaydada həll olunur. O cümlədən burada yığılan məktubların hər birinə cavab veriləcəkdir, bu məsələlər imkan daxilində öz həllini tapacaqdır. Ona görə, siz narahat olmayın.

Mən gəlmişəm ki, soruşum, sizi hansı əsas problemlər narahat edir. İşıqdır, sudur, qazdır, yoldur, məktəbdir - belə hansı ciddi problem var ki, mən bununla məşğul olum və kömək edim. Məni əsas maraqlandıran budur.

O ki qaldı şəxsi ərizələrə, onlara fərdi qaydada baxılacaq və lazımi tədbirlər görüləcəkdir. Kimə yardım lazımdırsa, o da göstəriləcək, başqa məsələlər də öz həllini tapacaqdır. Ona görə, mənə sizi narahat edən əsas məsələləri deyin.

MƏHƏRRƏM HƏSƏNZADƏ (Maştağadakı 108 nömrəli orta məktəbin direktoru): Cənab Prezident, bu, Sizin qəsəbəmizə ikinci gəlişinizdir. Xoş gəlmisiniz! Bütün maştağalılar adından Sizi hər bir evə dəvət edirəm, hər bir evin qonağı ola bilərsiniz. Siz də, ailəniz də bizim üçün çox əzizsiniz.

Maştağaya neçə illərdir asfalt salınmırdı. Asfalt salınan vaxt gəlmişdiniz.

İLHAM ƏLİYEV: Yox, yox, siz səhv edirsiniz. Mən keçmişdə Maştağaya çox gəlmişəm. 1970-ci illərdə də gəlmişəm.

MƏHƏRRƏM HƏSƏNZADƏ: Prezident kimi.

İLHAM ƏLİYEV: Bəli, Prezident kimi ola bilər.

MƏHƏRRƏM HƏSƏNZADƏ: Prezident kimi ikinci dəfədir gəlirsiniz. Ancaq mənim yaxşı yadımdadır ki, həftədə bir neçə dəfə bura gələrdiniz. Rəhmətlik Heydər Əliyevin tapşırığı ilə Maştağada Olimpiya İdman Kompleksi tikildi. Bu, Sabunçu və ətraf rayonlarda yeganə kompleksdir. Bunun özü təkcə Maştağanın yox, ətraf kənd və qəsəbə şagirdlərinin təlim-tərbiyəsində böyük rol oynayır. Biz cavanlığımızda belə bir yer tapa bilmirdik. Amma indi balalarımız, nəvələrimiz gedib orada idmanla məşğul olurlar.

Bu gün açılan Rabitə Evi də çox gözəldir. Mən o vaxt qəsəbə sovetinin sədri işləyirdim. Nömrə olmadığı üçün evə telefon çəkmirdilər. İndi Allaha şükür, hamımızın evində telefon var. Uşaqlarımız neçə gündür Rabitə Evində kompüterlərdən pulsuz istifadə edir, ingilis, fransız dillərini öyrənirlər. Bütün bunlara görə Sizə dərin minnətdarlığımızı bildiririk.

Son zamanlar qəsəbədə işıq problemi həll olunmuşdur. İşıqdan əziyyət çəkmirik. Bütün respublikada olduğu kimi, Abşeronda da qaz məsələsi sarıdan çətinlik var. Bu, bir az yaxşı olsa, qış aylarında camaatın qazdan heç bir narazılığı olmaz. Məktəblərimiz yaxşı təmir olunur. Ümumiyyətlə, biz Sizin daxili və xarici siyasətinizi dəstəkləyirik. Növbəti seçkilərdə xalqın qayğısına qalan ən layiqli insanlara səs verməyə hazırıq. Zəhmət çəkib qəsəbəmizə gəldiyinizə görə bir daha çox sağ olun.

İLHAM ƏLİYEV: Sağ olun. Mən də sizi ürəkdən bir daha salamlayıram. Mən çox şadam ki, yenə də birlikdəyik. Maştağada dəfələrlə olmuşam. Burada qeyd olundu, ilk idman komplekslərindən biri də məhz Maştağada tikildi. Mən bəzən bu yolla gedəndə görürəm ki, o kompleksdə canlanma var, uşaqlar gedib məşğul olurlar, sağlamlıqlarını möhkəmləndirirlər. Eyni zamanda, yollar da çəkildi. Bu gün mənə deyildi ki, burada bəzi yollar yaxşı vəziyyətdə deyil. Mən tapşırıq vermişəm ki, həmin yollara bu yaxınlarda gözəl asfalt salınsın.

Demək olar ki, işıq problemi həll olundu. İndi əsas məsələ odur ki, gərək elə edək, qışda bu problem yaranmasın. Bunu etmək üçün də tədbirlər görürük, yeni stansiyalar tikilir, yeni avadanlıq alınır. Qaz məsələsində bir az qıtlıq var. O da təbiidir. Çünki istehsal etdiyimiz qaz bizə çatmır. Rusiyadan almağa məcburuq. Bəzi hallarda oradan verilir, bəzi hallarda verilmir. Yəni bizdən asılı olmayan səbəblərə görə bu məsələ bir az bizi narahat edir. Amma bu il əlavə qazın çıxarılması nəzərdə tutulubdur. Gələn il “Şahdəniz” yatağından qaz çıxarılacaq və beləliklə, ümid edirəm ki, ilyarım, iki ildən sonra bu məsələ tamamilə aradan götürülməlidir. İldən-ilə yaxşılaşacaqdır, amma tamamilə aradan qaldırılması üçün haradasa iki il vaxt lazımdır.

Başqa məsələlər də var. Gərək məktəblər tikilsin, müəssisələr işə salınsın. İndi regionların inkişaf proqramı da icra edilir. Mən istərdim ki, bu bölgələrdə də yeni müəssisələr, fabriklər, zavodlar, iş yerləri açılsın. Bunu etmək üçün gərək siz də, biz də birgə çalışaq. Proqramlar icra olunmalıdır, rayon icra hakimiyyətinin başçısı yaxşı işləməlidir. Gərək şəhər icra hakimiyyətinin başçısı diqqət göstərsin. Yəni mənim mövqeyim belədir. Əsas vəzifə insanlara diqqət göstərmək, problemlərlə maraqlanmaq, harada çatışmayan cəhət var, onu aradan qaldırmaqdır. Bunu etmək üçün, necə deyərlər, gərək mənim də məlumatım olsun. Mən məlumatı ancaq kabinetdə oturub hansısa arayışı oxumaqla əldə etmirəm. Gərək gəlim, görüm, sizinlə əlaqə saxlayım, sizdən soruşum, sizi nələr narahat edir, biz gərək nələri düzəldək. Mənim məqsədim budur.

Bir də gəlmişəm ki, sizi görüm. Bu gün gözəl bir poçt binası açılıbdır. Təkcə poçt binası deyil, orada həm internet var, həm canlı videokonfranslar keçirmək mümkündür, həm də çox mədəni, müasir xidmət göstərilir. İndi ölkəmiz müasirləşir, ölkəmizin hər bir yerində tikilən yeni obyektlər yüksək standartlara cavab verir. Bu da inkişafdır. Yəni bu inkişaf ildən-ilə daha da sürətlə gedəcəkdir. Əminəm ki, bizim bütün problemlərimiz öz həllini tapacaqdır.

Sizə bir daha öz salamlarımı, hörmətimi çatdırıram. Arzu edirəm ki, hər şey yaxşı olsun, sabitlik, əmin-amanlıq olsun, insanlar daha da yaxşı yaşasın. Mən də bunun üçün əlimdən gələni edəcəyəm. Sağ olun.

X X X

Azərbaycan Prezidenti sakinlərlə bir daha səmimiyyətlə görüşdü, ona göstərilən ehtirama görə təşəkkürünü bildirdi. Maştağalılar dövlətimizin başçısına ən xoş diləklərini çatdırdılar, ümummilli lider Heydər Əliyevin siyasətinin davam etdirilməsinə bundan sonra da yardımçı olacaqlarını vurğuladılar.