Qətərdə 3-cü “Web Summit” keçiriləcək
Qahirə, 20 noyabr, AZƏRTAC
Fevralın 1-dən 4-dək Qətərdə 3-cü “Web Summit 2026” keçiriləcək.
AZƏRTAC QNA informasiya agentliyinə istinadla xəbər verir ki, bununla bağlı təşkilat komitəsinin iclası keçirilib. İclasda qlobal tədbirə son hazırlıq məsələləri, o cümlədən ötən həftə başa çatan Lissabon “Web Summit”inin nəticələri müzakirə edilib. Hökumət Kommunikasiya ofisinin direktoru və sammitlə bağlı yaradılmış Daimi Komitənin sədri Şeyx Casim bin Mansur bin Cəbr Al Tani bildirib ki, sammitdə startaplar və investorlar üçün əlverişli mühit yaradılacaq, regional və qlobal miqyasda fikir mübadiləsi aparmaq və rəqəmsal iqtisadiyyatın gələcəyini formalaşdırmaq üçün ideal bir platforma təmin ediləcək.
Qeyd olunub ki, “IBM” şirkəti Qətər sammitinin rəsmi süni intellekt tərəfdaşı olacaq. Eyni zamanda, “IBM” və Qətər “Web Summit”inin birgə təşkilatçılığı ilə idman texnologiyaları və süni intellekt sahəsində müsabiqə açıq elan edilib. Müsabiqənin birinci mərhələsi Qətər “Web Summit”ində başlayacaq və növbəti Lissabon sammitində başa çatacaq. Müsabiqədə startap layihələri təqdim ediləcək.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
